Unsaon sa pagpugos sa amahan pagsuporta sa mga anak?

Dear Atty. Divine,

Minyu ko ug adunay tulo ka mga anak, apan nagbuwag mi sa akong bana, since last year human nako siya masakpi nga adunay laing babaye. Gawas nga himabaye ang akong bana, sugarol pa gyud. Busa naka desisyon nako nga makigbuwag kaniya kay di na nako makaya ang kunsomisyon ug naapektuhan na pag-ayo ang akong mental health tungod sa stress og depression. Ang ako lang concern karon nga iyang suportahan ang among mga anak matag buwan kay dili kaigo ang akong income. Ang akong pangutana, unsay akong buhatun aron mapugos sa paghatag og sustento sa mga bata ang ilang amahan? -- Shy

* * *

Dear Shy,

Basi sa balaod, obligado ang imong bana nga mosuporta kanimo og sa imong tulo ka mga anak. Ang imong unang buhaton karon mao ang pagpahimo og Demand letter sa abogado alang sa imong pangayuon nga sustento sa mga bata matag buwan. Ang kantidad niini magdepende sa panginahanglan sa mga bata lakip na sa pagkaon, edukasyon og uban pa nilang gastuhan. Kon iyang ibalewala ang imong demand letter, mamahimo nimo siyang pasakaan og kasong criminal. Kini tungod kay ang iyang pagdumili sa paghatag og suporta usa kana ka kalapasan sa Republic Act 9262 kon Anti-Violence Against Women and their Children. Ang iyang kapakyas sa pagsuporta sa mga bata matawag kana nga economic abuse ug tungod kay criminal case man kini, mamahimo siyang mabilanggo kun mapamatud-an.  Lain nimong option mao ang pag file og kaso sa korte for child support og once ma grant na sa korte ang imong gipangayong sustento sa mga bata, hayan ma-obligar na gyud ang amahan sa imong anak sa paghatag og sustento matag buwan. Thank you and God Bless.

Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.