Ang politika ug eleksyon sa Pilipinas usa sa mga makapaukay nga mga kalihokan sa mga Pilipino. Naa tanan klase-klaseng mga drama, bulatik, panaad ug uban pa para makadani og mga botante.
Lain pa sab kining murag mga langaw nga pula og lubot, kanang magbalhin-balhin og partido. Kun kinsa ang kusog karong panahona, adto tanan mosuksok ang mga politiko aron madala sa kahig sa mga mananaog.
Kay notado naman ang mga Pilipinong botante (dili tanan) nga mahilig anang pagbotar og “’solid vote sa lineup.” Sa pagkatinuod, maayo lang og naay usa o duha sa mga kandidato anang partidoha ang nakahibalo gyud sila sa background o maayo sa ilang pagtan-aw.
Ang uban ana sa lineup wala gyud nila mailhi, apan kay kauban lagi sa ilang giganahang kandidato, nagtuo sila nga parehas sab kini kamaayo sa ilang pagtan-aw.
Apan diha nasayop ang mga tawo aning panultihong “birds with the same feathers, flocks together” kay dili kana tinuod.
Naa gyuy mga kauban diha sa lineup nga dili angayan sa posisyong gidaganan o ba kaha wala gyud kapabilidad para hatagan og posisyon. Apan kay lagi, impluwensiyado, sikat, ug kauban sa mga iladong politiko, apilon nalang sa kahig ini og botar.
Dili ba kaha tapulan lang gyud ang mga botante sa pagbasa sa mga pangalan nga nakasulat sa balota? Magdala man hinuon og kodigo nga hinatag rapud sa mga tigpamalit og botos nga ‘nangamang’ nila.
Mao nga wala lang untay reklamohay ug mahayahay. Kung unsay gibotaran ug nidaog mao na kana, dawaton sa way kusmod kay sila may nagpalingkod ani nila.
Kun ang mga botante sa Pilipinas ingon niini kakuwang paghatag og bili sa ilang sagrado ug nag-inusarang boto, samut na sa mga kandidatong nagpapili.
Kay kining mga kandidato mga tang-an man unta ug manghambog nga nasuhito sa balaod ug politika, ang uban gikan pa gyud og dagko ug karaang mga political clans magpagawong ra sa uban para makasay sa panahon ug makadaog kay madala sa kahig.
Unya ini og magkaproblema na, anha na ang pamuyboy kay walay ikabawos kanila. Unya kang kinsa man nang sala? Kinsa may nagpagamit ug kinsay manggamitay?