Lisod nang tuohan nga nahurot ni Bise Presidente Sara Duterte ang P125 milyones niyang confidential fund sulod lang sa 11 ka adlaw sa 2022. Mas lisod pa gyong tuohan nga apil sa iyang gasto sa kataposang semana sa tuig ang P16 milyones nga abang sa 34 ka safe houses.
Sa pagpangita pa lang daan og bakanteng balay nga kaabangan, maabtan ang ordinaryong tawo og pila ka buwan. Unsa na kaha ang 34 ka balay? Dali tingali para ni VP Sara kay mas sayon ang paggasto og kuwarta nga dili iya.
* * *
P1 milyon ang abang sa usa ka safe house nga iyang giabangan sa Disyembre 21-31. Sa ato pa, P91 mil kada adlaw. Kinsa may mangahas pagbungat sa makalilisang nga presyo bisan sa labing mahalong hotels, resorts ug mga balay sa luhong subdivisions?
Bulawan ba ang mga pultahan, mga kaldero ug mga inuduro? O dako kaayong gasto sa pagtukod kay gilubong sa kinalawoman nga bunker sa Davao City? Mas lisod pang tuohan nga dili lang usa. Kon dili duha ka safe houses ang tagsa ka milyon ka pesos ang abang.
* * *
Kinsa man ang gipapuyo ni VP Sara sa 34 ka mahalon nga mga balay? Kay ang confidential funds para ra man sa surveillance, unsa man kangilngig ang mga espiya ug informants nga iyang gipahimutang? Giunsa man niya sila pagpangita, pag-recruit, pag-screen ug pagsabot sa ilang trabaho sulod lang sa, nakatag-an ka, 11 ka adlaw?
Bugtong katuohan nga nakagamit sa safe houses sa kamubo sa panahon sa pagtapok nila mao ang kapin sa 400 niya ka guwardiya.
* * *
Nakapait mao nga bisan sa kakuwestiyonable sa gilistang mga gasto ni VP Sara, walay mahimo ang Commission on Audit (COA) gawas sa pagdawat sa iyang gisumiter nga mga dokumento kay:
Ang Intelligence and Confidential Fund Audit Unit (ICFAU) sa COA kuwang sa auditors nga makasusi sa katinuod sa mga nasuwat sa dokumento; ug
Ang Joint Circular sa paggamit sa confidential ug intelligence funds (CIF) igo rang nisugo nga mosumiter si VP Sara og certification bisan walay official receipt, walay IDs ang mga nipirma sa acknowledgment receipts ug walay klarong mga detalye duna ba gyoy tinuod nga safe houses.
* * *