EDITORYAL — E-vehicles dako'g tabang

Usa ka maayong lakang ang gustong buhaton ni Cebu City Mayor Raymond Alvin García nga mamalit ang siyudad og electric vehicles para sa mga departamento.

Ang electric vehicles uso na karon sa ubang mga nasud isip alternatibo sa mga sakyanang nigamit og petrolyo.

Ang gobiyerno nagtinguha nga mamenusan ang pagsalig niini sa petrolyo ug usa kining paggamit og renewable energy sources ang solusyon.

Gawas nga makadaginot sa gastos sa budget sa krudo, makatabang sab kini sa pagmenus sa gidaghanon sa hinungdan sa polusyon tungod sa aso sa makina.

Menus sab ang noise pollution sa kadalanan.

Aning paagiha, triple ang kaayohang maangkon sa tanan.

Makatabang sab ang lakang sa mayor para madani ang mga pribadong sektor pagsunod sa siyudad, ilabi na kun ang gamiton sa sakyanan sili kinahanglang heavy duty sama sa mga trak.

Mas maayo gani unta kun ang Cebu City dunay pandayong ordinansa nga kinahanglang ang matag gasoline stations magbutang sab og charging stations para sa mga electric vehicles.

Kay niining paagiha, mawala ang pagduhaduha sa mga tawo sa pagpalit og electric vehicles para sa ilang personal nga gamit kay di na kinahanglang sa balay lang mag charge sa ilang mga baterya.

Kun modaghan ang mga electric vehicles, modaghan ang mamaligya niini.

Kun daghang mamaligya, mokusog ang kompetisyon ug moresulta ni nga mobarato ang electric vehicles.

Aning paagiha, daghan na ang makapalit.