Modus sa proyekto

Dugay nako’ng nakamatikod sa mga proyekto diha sa habagatang bahin sa Sugbo nga nanimahong anomaliya. Pananglitan, dunay mga proyekto pag-ayo sa mga karsada nga kunohay gidumala sa usa ka pribadong kontraktor, basi sa billboard nga kinahanglang ibutang sa dapit agi’g pagtuman sa lagda sa Commission on Audit, apan mga ekipo sa lungsod ang imong makit-ang gigamit.

Dunay ubang mga proyekto nga ang mga ekipo ug trabahante sa kompaniya nga gipanag-iya sa usa ka dakong opisyal maoy nagtrabaho bisan lahi ang kontraktor nga nakadaog sa bidding. Ug sigun sa mga suhito sa negosyo sa construction, kumon kuno ni nga modus sa mga kurakot nga opisyal nga mogamit og laing kompaniya aron makalusot sa asunto—labi pa og pundo gikan sa imong opisina ang gigamit sa proyekto unya ikaw ra poy nangontrata.

Gihisgutan ni nako tungod kay ingon ini ang unod sa suwat nga gipadala sa usa ka nagpakabana nga molupyo sa lungsod sa Dalaguete ngadto sa National Bureau of Investigation (NBI)-7. Usa ka Ildebrando Almagro ang miawhag sa NBI-7 pinaagi sa suwat ngadto sa regional director nga si Atty. Renan Oliva nga imbistigahan ang iyang gidudahang anomaliya sa proyekto sa ilang lungsod.

Sigun sa suwat ni Almagro nga penetsahan og Oktubre 11, 2024,  dunay gihimong road concreting didto sa ML Quezon Street sa ilang lungsod du-ol sa iyang pinuy-anan. Ang proyekto giingong gipundohan sa Department of Public Works and Highways (DPWH) sa kantidad nga P9,599,243.95.  Ang Soccor Construction giingong maoy nakadaog sa bidding ug busa angayang maoy mohimo sa proyekto.

Apan sa dakong katingala ni Almagro, mga kawani sa lungsod sa Dalaguete maoy mihimo sa trabaho ug ang municipal engineer mismo maoy iyang nakit-an nga nagsupervise sa proyekto hangtod nga kini nahuman.

Pangutana sa yanong magbubuhis unsang hitaboa nga ang proyekto sa DPWH nga gi-award ngadto sa usa ka pribadong kontraktor, mga kawani man sa lungsod maoy nagtrabaho?  Buot ni Almagro nga imbistigahan sa NBI ang posibling panagkunsabo sa mga opisyal sa lungsod, DPWH, ug sa pribadong kontraktor.

Usa sa angayang tutukan sa mga imbistigador kinsay nagpaluyo sa pribadong kontraktor? Tinuod ba gyud nga silay nakadaog sa kontrata o igo ra silang gibayran og royalty aron gamiton ang ilang kompaniya pagsalmot sa bidding, apan ang tinuod lain ang kontraktor?

Ug angayang susihon sab ang ubang mga proyekto niining maong kontraktor tungod kay posibling dili lang ni sa Dalaguete nahitabo.