Kung ang survey maoy tuohan, makaayo para sa Pilipinas ang nigawas nga resulta nga mayoriya na karon sa mga Pilipino ang dili na mosuporta og mga kandidatong gipaluyohan o adto nakapusta sa China.
Sa survey nga gipabuhat sa Stratbase ADR Institute gikan Septiyembre 6 hangtud Septiyembre 13, nigawas nga 73 porsiyento sa mga napangutana ang kusganong mipadayag nga dili sila mosuporta o mobotar og kandidato sa national positions kun sila “pro-China at present or in the past.” Ang Stratbase ADR Institute mikuha sa serbisyo sa Pulse Asia alang sa paghimo og survey tungod sa taliabot nga 2025 polls. Apil sa pilionon mga senador ug kongresista. Sa Senado ug Ubos Balaybalauranan naglingkod ang mga maka-impluwensiya sa mga polisiyang pagahimuon sa presidente sa nasud. Ang ilang tingog makaapektar sa mga desisyon sa presidente para sa nasud, bisan unsaon pa og supak sa katawhan.
Dako sab sila og papel kun magkahiusa sila pagsuporta sa presidente o pagpalagpot kaniya pinaagi sa impeachment.
Hinuon, duna gihapoy singko porsiyento nga gusto gihapong suportahan ang mga kandidatong pro-China karon ug kaniadto pa. Samtang 23 porsiyento ang wala pa kahibalo kun botaran ba nila o dili.
Nakita nga sa 73 porsiyento, ang kadaghanan niini gikan sa Visayas 85 porsiyento, sunod ang Metro Manila sa 83 porsiyento ug Mindanao 74 porsiyento ug ang uban gikan sa Luzon nga 65 porsiyento.
Sa Mindanao, 10 porsiyento gikan sa 74 ang gikan sa ABC classes (mga adunahan), gusto nilang suportahan ang mga “pro-China candidates.” Tingali mga negosyante ni sila ug kasosyo mga Chinese ug sagad sa ilang produkto gikan sa maong nasud. Sa eleksyon, ang botante maoy gamhanan tungod kay ang ilang usa ka boto makatabang og diktar sa kaugmaon sa nasud ug sa ilang mga anak. Apan nakaila ba kaha sila kun si kinsa sa mga kandidato nga adto pusta sa China.
Kun ang modaog “binuhi” sa nasud nga walay pagtahod sa soberiniya nato diha sa West Philippine Sea, mogawong sa mga magbabalaod aron ang ilang interes maoy mopatigbabaw, mosulsol sa mga Pilipino paghimo og supak sa kabubut-on ug magbutang sa peligro sa seguridad sa nasud, mag-unsa naman lang ang kabataang Pilipino?