PRRD VS. PBBM

Unsa man kaha ang inyong mahinumduman sa unang tulo ka tuig sa pagdala sa renda sa kagamhanan sa nasud sa Pilipinas nila ni kanhi Presidente Rodrigo Roa Duterte (PRRD) ug kasamtangang Presidente Ferdinand "Bongbong" Romualdez Marcos Jr. (PBBM)

Sa dili pa ta moadto sa gihimo sa duha ka presidente sa nasud ato una nga balikan ang ilang mga saad ngadto sa katawhan aron sila mapili nga presidente.

Gipili sa katawhang Pilipinhon ang mayor sa Davao City nga si Rodrigo Roa Duterte tungod sa saad niini nga iyang wagtangon ang suliran sa gidili nga drugas sulod lamang sa tulo ka buwan.

Samtang gipili usab sa pagka presidente si kanhi senador Ferdinand Romualdez Marcos Jr. tungod sa saad niini nga iyang pabaratohon ang kilo sa bugas ngadto sa tag P20.00.

Wala pa makapanumpa ug wala pa makalingkod sa Malakanyang gisugsan na sa pagpatuman ni PRRD ang iyang kampanya sa gidili nga drugas pinaagi sa gilusad niining Tokhang o Toktok Hangyo. Tulo ka buwan human milingkod sa Malakanyang si PRRD wala niya masulbad ang suliran sa gidili nga drugas. Nangayo siya ug dugang tulo ka buwan dayon usa ka tuig apan wala gihapon masulbad niini ang gidili nga drugas. Dinhi giangkon na ni PRRD nga lisod gyod sulbaron ang suliran sa drugas. Human manumpa sa pagka presidente, gipangunayan sa paghupot mismo ni PBBM ang Departamento sa Agrikultura aron maseguro ang pagpabarato sa kilo sa bugas. Apan ang nahitabo misamot hinuon sa pagsaka ang prisyo sa kilo sa bugas nga nakapaaghat kaniya sa pagpagawas og kamandoan sa pagbotang og limitasyon sa prisyo sa kilo sa bugas.

Sa iyang gubat batok gidili nga drugas, gipapriso ni PRRD si Senador Leila de Dima nga giinging protector sa mga druglord. Gipatay ug gilutos ang mga dagkong pangalan sa gidili nga drugas lakip na ang mga tagas nga opisyal sa kapolisan ug mga, politician. Si Kerwin Espinosa miangkon nga siya druglord.

Maoy gipuntarya ni PRRD ang kaluwasan sa katawhan.

Giklaro ni PBBM nga ang iyang kampanya batok sa gidili nga drugas pinasubay kini sa pagtamod sa tawhanong katungod.

Sa administrasyong PBBM naabsuwelto ug gipagawas sa prisohan si Leila de Lima ug ang self-confesed nga druglord nga si Kerwin Espinosa namasangil ni Senador Bato Dela Rosa nga mipugos kaniya sa pagpaangkon nga druglord.

Aron mapaduol sa tinuod ang saad nga baratong bugas gimugna ni PBBM ang Kadiwa stores nga nagbaligya ig baratong bugas sa pila lang ka dapit sa nasud apan dili gihapon tag P20.00 ang kilo. Maoy gipuntarya ni PBBM ang pagbusog sa tiyan.