Pam vs Gwen

Ang challenger ni Cebu Governor Gwen Garcia nga si Pamela Baricuatro miatubang sa mga sakop sa media kaniadtong miaging semana.

Tan-aw nako, utokan sab kini si Baricuatro kay siya man gani diay ang secretary general sa PDP-Laban. Gawas sa iyang pagka utokan, hitsuraan sab.

Apil sa iyang mga top priorities nga mga proyekto kon padag-on siya sa katawhan sa probinsiya, mao ang pag-atiman sa panglawas.

Nindot, kay ang katawhan mopangga gyud sa mga opisyal nga mohatag og pagtagad sa pag-atiman sa ilang panglawas. Apan ang problema ni Baricuatro, dili niya mapadangat ang iyang mga programa de gobiyerno sa tanang dapit sa probinsya.

Tan-aw nako, lupigon gyud siya ni Gwen kay sa dugay na niyang nahimong gobernador, nasuroy na ni Gwen ang ubay-ubayng mga hilit nga barangay.

Ang mga tawo gud, mas mobotar gyud sa mga kandidato nga ilang nahikap, nagakus, naestorya, ug ilabi na kon nakahatag kanila og tabang.

Mao nga bisan og takus pa si Pam Baricuatro nga mahimong gobernador, tungason kaayo alang kaniya ang pag-angkon og kadaogan. Aw, hinoon, ilaila lang usa sa katawhan.

Nakabantay ra ba ko nga mora’g pintok og sinultihan si Pam, ug dili kaayo makigsandurot sa katawhan. Aw, panid-an lang nato sa umaabot nga mga adlaw.

* * *

Sa mga kandidato, mas makapabor gyud ang mga incumbent kay magamit man nila ang mga proyekto sa kagamhanan aron mohumot sila sa katawhan.

Sama dinhi sa Cebu City, way pahuway si Mayor Raymond Alvin Garcia pag-atiman sa mga proyekto sa siyudad nga makabenepisyo ang publiko, ingon man sa pagtambong sa mga kalihokan.

Ang gisaad ni Raymond nga ang mga sakop sa Lupon sa kabarangayan, ug ubang barangay workers pahatagan og tag P5,000 nga bonus, makatabang kaayo sa iyang kandidatura.

Mga senior citizens pahatagan dayon ni Raymond sa ilang financial assistance sa una pa lang semana sa Disyembre, ug pakapinan pa og P500.

Sus, kadaghan sa mga senior citizens ug kawani sa barangay nga siguradong modapig kang Raymond. Mao kini ang dakong problema nila ni mayoralty candidates Nestor Archival, Yogi Ruiz ug kanhi mayor Mike Rama.

Unya, si Raymond pa gyud maoy mipirma sa natanggong nga permit alang sa unom ka kontraktor sa MCWD nga manaod og mga tubo sa tubig diha sa kabukiran.

Ang maong application sa mga kontraktor sa MCWD natanggong sa opisina sa kanhi city administrator ug napirmahan lang dihang si Raymond mibanos sa pagdumala sa siyudad.

Pinaagi niini, makatubig na ang taga bukirang barangay gikan sa tubig sa Barangay Lusaran nga project sa JE Hydro & Bio-Energy Corporation.

Ang lunop sa downtown area gipaningkamotan na sab ni Raymond nga masulbad na, pinaagi sa pagguba sa nakaali sa tubig didto sa pantalan.