EDITORYAL — Rebelasyon ni Garma

Susama og bomba ang gipangbutyag ni kanhi police colonel Royima Garma ngadto sa quad-committee hearing may kalabotan sa mga nahitabong extrajudicial killings ug war on drugs.

Si Garma nga mao sab ang kaniadto pangulo sa PCSO, naghilak nga nibasa sa iyang pinanumpaang affidavit nga mialegar nga gikan mismo kang kanhi presidente Rodrigo Duterte ang kamandoan sa paghimo sa “Davao model” sa kampanya batok ilegal nga drugas sa tibuok nasud.

Matud pa ni Garma sa atubangan sa mga magbabalaod, didto nahitabo ang paghatag kaniya sa kamandoan sa mismong panimalay ni Duterte sa Doña Luisa sa Davao niadtong  Mayo 2016.

Matud pa ni Garma sa iyang pamahayag, gusto ni Duterte nga mangita si Garma og polis o operatiba nga miyembro sa Iglesia ni Kristo aron mangulo sa task force.

Si Garma mitug-an sab nga iyang girekomendar ang iyang upperclassman nga si Edilberto Leonardo nga nadestino sa CIDG kaniadto. Ug sugod niadto, nisunod na dayon ang reward system para sa mga polis nga makapatay og drug suspect.

Ang reward manukad P20 mil ngadto sa P1 milyon depende sa gidak-on sa drug suspect nga ma neutralized o mapatay. Daghang gipangbutyag si Garma nga naglambigit og mga dagkong pangalan sa palibot ni Duterte sa dihang naa pa kini sa gahum.

Sa mga nagtan-aw sa video sa quad-committee hearing, ilabi na sa mga Sugbuanon nga nakaila ni Garma, dili makatuo nga mihilak kini samtang nisaysay sa iyang pinanumpaang affidavit.

Si Garma nabantog nga suod kaayo ni Duterte sanglit didto kini nadestino kaniadto sa Davao sud sa taas nga panahon.

Gani wala kini gikahadlokan sa dihang nadestino pa kini dinhi sa Sugbu ilabi na sa Cebu City Police Office.

Apan dihang gipangutana kun nganong nibutyag siya niini karon, si Garma miingon nga nakaamgo na siya ug ang motibasyon mao ang tinguha nga ma-reporma ang PNP.

Miangkon siya nga nabalaka ug nahadlok gyud siya karon para sa kinabuhi sa iyang pamilya, mga kahigalaan ug bisan sa kinabuhi sa iyang mga classmates sa PNP Academy,  apan kinahanglan niya kining buhaton aron mobalik ang pagsalig sa publiko ngadto sa kapolisan.