Ang mga demonyo

“Unya may gubat didto sa langit. Si Miguel ug ang iyang mga kaubang mga anghel, nakigsangka sa dragon ug sa mga anghel niini.

Apan nabuntog ang dragon ug ang mga anghel niini ug gipanghinginlan sila gikan sa langit.

Gitambog ang dakong dragon, ang karaang bitin nga ginganlag yawa o Satanas nga maoy naglimbong sa tibuok kalibutan. Gitambog siya uban sa tanang mga anghel niya ngadto sa yuta.” (Gip. 12;7-9)

Kun anaa ang mga anghel anaa usab ang mga demonyo.

Sila kadtong mga anghel nga nisupil sa Dios nga tungod niini gihinginlan sila gikan sa langit ug hangtud karon ania sila dinhi kuyog nato kang kansang tumong mao man ang pagpagdagmal ni bisan kinsa nga gimahal sa Dios. Kitang mga tawo nga gimugna sumala sa iyang dagway ug kasamahan mao ang gipunting ning maong mga masupilon.

Ang Pagkapukan sa mga Anghel

Diha sa katesismo sa Simbahan (Catechism of the Catholic Church) atong makita kining mosunod:

Diha sa pagsupak sa atong unang mga ginikanan, nagpahipi ang usa ka malinglahon ug madanihong tingog nga dakong supak sa Dios. Kining maong tingog maoy hinungdan kun nganong nahulog sila laang sa kamatayon gumikan sa kasina.

Ang Balaang Kasulatan ug ang Tradisyon sa Simbahan niisip ning maong Napukan nga  Anghel ingon nga yawa kun Satanas.

Ang pagtulon-an sa Simbahan nipasabot nga sa sinugdan ang yawa gihimo nga maayo. Usa siya ka maayong anghel.

Ang mga demonyo sa sinugdan gihimo nga maayo apan nahimong dautan gumikan sa ilang kaugalingong binuhatan.

Non Serviam! Dili ko Molagad!

Diha sa ilang kagawasnon ug sa ilang kabubut-on ilang gisupak ang Dios ug nagdumili sila sa pag-alagad kaniya ni gidawat nila ang iyang paghari.

Nisalamin ang maong pagsupak ngadto sa mga pulong gibuhian sa manintal ngadto sa atong unang mga ginikanan diha sa pag-ingon niini: “Mahisama kamo sa Dios!”

Sa sinugdanan pa lamang nakasala na ang yawa. Bakakon siya ug siya ang amahan sa tanang mga bakak!