Motibo ni Kerwin
Sa iyang pag-atubang sa Quad Committee sa House of Representatives gahapon, si Kerwin Espinosa wala kalimot sa iyang dila nga Sugboanon. Sa lisod ug emosyonal nga mga bahin sa iyang testimoniya, napugos si Kerwin sa pagdangop sa Binisaya aron mas klarong mapadayag ang iyang kaugalingon.
Pahinumdom nga ang usa sa labing kontrobersiyal nga personalidad sa drug war ni kanhi Presidente Rodrigo Duterte nahimugso sa Dakbayan sa Sugbo. Sa wala pa mobalhin ang ilang pamilya sa Albuera, Leyte, si Kerwin nagdako sa karaan nilang pinuy-anan sa Sityo Cahipa, sa Barangay Hipodromo.
* * *
Katuohan ang pangangkon nga Binisaya ang hulga gikan sa taga Davao ug taga Bohol nga si kanhi Philippine National Police (PNP) Chief Bato dela Rosa nga siya ug mga sakop sa iyang pamilya ang isunod pagpatay, human gipusil si Albuera Mayor Rolando Espinosa sulod sa selda sa Baybay City Provincial Jail, kon si Kerwin dili moangkon nga drug lord.
Pero lisod tuohan nga nag-Binisaya silang Ronnie Dayan, taga Urbiztondo, Pangasinan nga drayber ni kanhi Senador Leila de Lima, aron magkapareha ang mga petsa ug ubang detalye sa ilang affidavits.
* * *
May mga taga Sugbo nga giingon ni Kerwin nga gipamugos ni dela Rosa nga iyang pasanginlan: Si Peter Lim iyang gitumbok nga supplier sa shabu ug si Heneral Vic Loot giingong ni-recruit niya sa Regional Anti-Narcotics Unit (RANU) ug nisugo niya pag-recycle sa nasakmit nga shabu.
Ginganlan sab ni Espinosa si anhing Police Captain Delfin Bontuyan sa Criminal Investigation and Detection Group (CIDG) nga nipahibawo niya nga apil ang iyang amahan sa drug list ni kanhi Presidente Rodrigo Duterte.
* * *
Nangayo og pasaylo si Espinosa ni kanhi Senador Leila de Lima ug uban niyang gilambigit sa ilegal nga drugas kay napugos lang siya pagtuman sa ilegal nga mga sugo nilang dela Rosa ug Duterte aron nga dili siya mamatay.
Dili kalikayan nga kadudahan kon hustisya ba para sa kamatayon sa iyang amahan ang motibo ni Espinosa sa pag-atubang sa quad committee, pagtanyag nga motabang sa imbestigasyon sa International Criminal Court (ICC) sa mga pasangil sa crimes against humanity batok nilang Duterte ug dela Rosa ug nideklarar sa iyang kandidatura sa pagka mayor sa Albuera.
* * *
- Latest
