Wa mohatag og suporta sa bata

Dear Atty. Divine,

Usa ko ka inahan, nagbuwag mi sa papa sa akong youngest child kay nasakpan man nako nga naa siyay laing karelasyon. Kining amahan sa akong anak nagtrabaho sa usa ka mining company. Miuli ko sa amoa tungod sa akong pagduda nga aduna siyay karelasyon hangtud nga ako gyud kining nakompirmar kay matag weekend adto na siya matulog sa gipuy-an sa babaye nga anaa sab magtrabaho sa iyang kompaniya ug karon wala nako manghilabot niya. Ang ako lang problema kay gahi kaayo siya mohatag og para sustento sa bata. Unsay akong buhaton aron mapugos ni siya sa paghatag og suporta? Pwede ba nako ireklamo sa ila office nga naa siyay karelasyon nga kauban niya sa kompaniya? Palihug lamdagi ko atty. Daghang Salamat. -- Lily

Dear Lily,

Basi sa balaod obligado ang amahan sa bata nga mosuporta sa imong anak. Hinuon way amount nga gitakda kun pila ang dapat ihatag nga child support kay magdepende man kini sa panginahanglanon sa bata ug kun pila ang iyang magasto monthly. Sultii ang amahan sa bata nga mas maayo nga magpirmahanay mo og kasabutan atubangan sa social worker or sa barangay labot sa iyang paghatag og sustento sa inyong anak matag buwan. Mas maayo sab nga imong icompute daan kon pilay panginahanglan sa bata aron mao kini basihan sa imong i-demand kaniya nga amount. Mamahimo sab nga moduol ka og abogado aron maoy mopadala og demand letter ngadto sa amahan sa bata alang sa pagpangayo og ayuda. Kun magmagahi gyud siya sa paghatag then mamahimo kang modangop sa korte pinaagi sa pagpasaka og Petition for Child Support. Samtang kalabot sa iyang karelasyon sa imong kapuyo, makareklamo ka kun kasado mo . Apan kun dili mo kasado maglisud gyud ka tungod kay makonsiderar pa man nga ulitawo siya. Ang maayo nimong buhaton karon mao ang pag focus sa pagpadako sa imong mga anak inay maghuna-huna ka anang pagluib sa imong kapuyo. Thank you and God Bless! -- Atty. Divine

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.