Makapahiubos ug makalagot ang balitang dunay usa ka tinun-an sa pagka-polis nga gikulata og duha ka polis kay gipasanginlan kini nga miunay og kawat sa mga butang sa gibantayan niining panimalay diha sa Dakbayan sa Lapu-Lapu.
Ang maong duha ka polis girelibohan na sa pwesto ug gipaubos sa imbestigasyon sa ilang kadagkoan. Wala gibutyag sa mga kadagkoan sa Lapu-Lapu City Police Office ang mga pangalan sa duha ka polis nga gireklamo sa 20-anyos nga estudyante.
Ang batan-on matud pa sa report, nagkuyog uban sa apohan niini ug tagiya sa balay nga gikawatan aron ipa-blotter nga nawala ang bisekleta ug chainsaw.
Apan matud pa inay nga mohimo og imbestigasyon bahin sa hitabo, gidiretso man hinuon og interogasyon ang batan-on kay matud pa kini maoy gidudahan sa maong mga polis nga miunay og kawat sa mga nawagtang nga butang.
Matud pa sa alegasyon sa banay sa batan-on, gibunalan kini og baseball bat, gibukbok og arnis ang mga kamot ug gisagpa-sagpa atol sa interogasyon aron paangkunon nga siya maoy miunay og kawat sa maong mga butang.
Gikatahong gipa-drug test sab ang batan-on ug giingong nigawas nga ‘positibo’ kini sa paggamit og ilegal nga drugas, apan kusganon niya kining gihimakak.
Ang batan-on midangop kang Lapu-Lapu City Mayor Junard “Ahong” Chan aron magpatabang sa gidangatan gikan sa mga kamot aning maong mga polis ug misaad nga mahatagan kini og hustisya.
Nasayran nga ang apohan sa batan-on dugay ng panahon nga caretaker sa maong balay, gani ang batan-ong gikulata, nagkuyog-kuyog na sa iyang apohan sa trabaho niini sa maong balay sukad pa sa 9-anyos pa siya.
Sa ato pa, 11 ka tuig na nga nagsulod-gawas sa maong balay ang batan-on ug diha na siya halos magdako.
Ang maong batan-on kay mikuha og kursong criminology, siguradong dako ug taas kaayo kini og respeto sa mga polis. Unsa kaha ang iyang pagtan-aw kanila karon, mga unipormadong kriminal?
Ang mga alegasyon sa maong batan-on kinahanglang masusi kun unsa ka tinuod. Makatarunganon lang sab nga madungog ang habig sa duha ka polis.
Apan kun mapamatud-an kun kinsa sa duha ka habig ang nagtug-an tinuod, angay gyud manubag sa balaod. Kun ang batan-on, angay siyang silotan, apan kun ang mga giakusahang polis gani, wa silay luna sa PNP.