Walay Rodrigo sa Senado

Gikan sa unang adlaw, Oktubre 1, 2024 ngadto sa Oktubre 8, 2024 (kataposang adlaw) sa pagpinaylanay og Certificate of Candidacy (COC), daghang diehard Duterte supporter (DDS) ang nagsakripisyo sa pagpaabot sa tres Dutertes didto sa Comlec-Manila, kinsa gituohang mokandidato kuno pagka-Senador alang sa 2025 midterm election. Apan hangtod ning pagsulat, 11:30 a.m, Oktubre 8, 2024, wala gyoy Duterte nga miabot.

Hinuon, sa miaging Oktubre 5, sa usa ka Davao City press conference adunay nangutana kon tinuoray bang molansar si kanhi Presidente Rodrigo Roa Duterte (PRRD) pagka Senador, siya misumbalik pagsukna: “Sa inyong tan-aw, kaya pa ba niining 73-anyos ang paghupot og nasiyonal nga posisiyon?” Ug iyang giklaro nga dili na kaya ang grabing kabug-at sa trabahoon sa Senado.

Pero dihang adunay mipahibalo nga gusto ang taga Davao nga mag-mayor siyag balik, haskang dalia nakakambiyo ni PRRD: “Aw, mao ba kanay clamor sa mga tawo? Aw sige, diha ta!” Unya may mipaloap-pangutana kon mag-unsa na man lang si Baste? Diin, iyang gitubag nga si Baste maoy mag-bise mayor.

Pagka Oktubre 7, bisperas sa deadline pagpayil og COC, nagdungan ang amahan ug anak pag-adto sa Commission on Election (Comelec)’s office, Davao City aron mo-file. Diin, gidumog sila sa bagang duot sa ilang mga dumadapig, kinasingkasing nagpaninggit sa ilang bansagon, timaan nga gipangga ug gimahal gihapon sila sa mga Dabawenyos.

Tinuoray, hinay na gyod si Tatay Digong. Ultimong iyang edad, nakalimot na siya. Kay imbes 79-anyos na, moingon man nga 73 anyos pa.

Sa bagay, matud niya, duna siyay sakit nga kanser ug anytime, dili lang mahibaw-an nga mobiya na niining kalibotana. Bisan sa mga nangaging Maisug Prayer Rally nga iyang gitambongan, agakon na man siya aron makabarog pagtarong diha sa iyang pagdiskurso.

Busa, husto iyang hukom nga mag-mayor na lang samtang si Baste mag-bise. Kay simbako, adunay mahitabo niya, anaa si Baste nga mohulip. Ug ang kamauswagon sa Davao City magpadayong mosulbong. Kana, kondili ihokus-pokus ang eleksiyon ug sila maoy modaog.

Kining kasamtangang kondisiyon sa panglawas nga gitug-an mismo ni PRRD, igo nang makapahayag nganong walay Rodrigo sa Senado inig ka 2025. Diin seguradong makahatag og magkasumpaking pagbati: may malipay-mahimuot, anaa poy maguol-magbagutbot!