Pagpamalandong sa Malangkubong kaayohan
Ang Unang tulo ka mga ang-ang mao kadtong anaa gyud sa duol sa Dios ug sa direkta mente nga paagi nidayeg ug nisimba Kaniya. Naglangkob kining mosunod:
1. Serapin. Kini ang pinakataas sa mga koro sa mga angheles nga dunay halapad ug tataw nga pagsabot sa kabubut-ong Diosnon. Ang ilang gugma sa Dios nagdilaab sa kainit. Ang pulong serapin kun seraphim nagkahulogan man og the burning ones. Si Lucifer nga nagkahulogan og Light-bearer kaniadto usa man kanila mao nga hangtud karon gamhanan gihapon si Lucifer ug makuyaw.
2. Kerubin. Nama-landong sila sa Dios ubos sa landong sa iyang Diosnong Pag-amoma. Ang pulong kerubin ang nagkahulogan man og fullness of wisdom. Kun kapuno sa kaalam.
3. Ang mga trono namalandong paghukom ug gahom sa Dios. Simbolo sila sa paagi nga mopahamtang ang Dios sa iyang gahom sa paghukom.
Ang sunod nga tulo ka mga koro mao kadtong mopatuman sa Maamomahong laraw sa Dios alang sa Uniberso.
4. Kamandoan (Otoridad). Sila kadtong nagmando sa mga anghel nga ubos sa ilang pagdumala.
5. Mga Birtudes. Gidawat nila ang mga sugo gikan sa kamandoan Ang mga birtud nagpasabot man og gahom, o kusog
6. Kagahuman. Nialagad sa mga birtudes pinaagi sa pakigsangka sa impluwensiya sa dautan nga nahimong supak sa maamomahong laraw sa mga birtudes.
Ang katapusang hut-ong sa mga koro mao kadtong naglihok ug naggiya sa kalihukan sa mga tawo.
7. Ang mga Prinsipalidad mao ang natahasan sa pagdumala ug pag-atiman sa mga kanasuran.
8. Mga Arkanghel (Sama nilang Miguel, Rafael ug Gabriel) sila kadtong nagdala sa mga mensahe sa Dios ngadto sa mga tawo.
9. Ang mga Anghel nga Magbalantay sila kadtong nag-atiman sa tagsa tagsa kanatong mga tawo ug nanalipod kanato batok sa gahom sa kangitngit.
Kining maong tradisyonal nga matang sa paghan-ay sa mga koro sa mga angheles ang gidawat sa pagtuong Katoliko bisan pa man kun kini dili kabahin sa Dogma sa Simbahan. Bisan gani si Sto. Tomas Aquino ang nigahin man sa Summa Theologiae aron pagatukion kining maong hilisgutan.
Matud pa bugtong ang mga arkanghel ug ang mga anghel nga mga magbalantay ang adunay direkta nga kalambigitan sa tawhanong kalihukan. Ang ubang mga koro nga naglihok sa sa dili dayag nga paagi mahimong naglihok kuyog sa Dios o ang uban kanila nagdumala sa kalibutan. Si San Francisco sa Assissi ang giisip nga lahi ug dili kasarangan sanglit ang iyang stigmata ang gihatag man kaniya pinaagi sa usa ka serapin. Mao ni ang hinungdan kun nganong alang sa mga Franciscano si San Francisco gitawag og Seraphic Father. Unsa kaha ang atong bation kun sama ni Natanael ang atong Ginoong Jesus magkanayon: “Makita mo ang mga anghel nga magsaka kanaog sa Anak sa Tawo!