Mura og adunay dakong selebrasyon ang talan-awon sa mga buhatan sa Comelec kagahapong adlawa, kataposang adlaw sa pagduso sa mga certificates of candidacy sa mga mokandidato sa eleksyon sa sunod tuig.
Gawas nga mura og sadya ug hugyaw ang tanan ilabi na sa mga dagkong lokal nga partido ug kandidato nga gikuyogan sa ilang nagsaba-saba nga nagpanong mga supporters , duna puy pipila ka mga niduso sa ilang COCs nga nag-inusara ra. Hinuon kay dili man tanan dako ‘g pundo para mogasto og daghang mga supporters nga manguban sa filing sa COC, dunay uban nga gikuyogan gyud sa ilang numero unong mga tigpaluyo, ang ilang mga mahal sa kinabuhi o pamilya.
Daku-dako sab ang gastos sa mga dagkong kandidato o partido kay kinahanglan man sab sila og logistics, probisyon o pagkaon sa mga supporters, banderitas, campaign t-shirts ug daghan pang uban.
Sa kataposang adlaw sab dunay daghang mga kinara-kara nga mga desisyon kay nausab ang hunahuna sa ilang pagkandidato.
Dunay mi-withdraw sa gidaganan unya duna say nagbaylo og gidaganan, nag-usab sa gidaganan ug uban pa. Sagad gyud kini mahitabo matang kataposang adlaw sa pagduso og COC. Gawas niadtong tinud-anay ang rason nganong nag-usab ilang hunahuna tungod sa mga bug-at nga rason, adunay uban nga parte kadto sa ilang estratehiya. Estratehiya nga ang tumong aron dili makapanagang ang ilang mga kaatbang sa kung unsa ilang buhatong kausaban sa ilang lineups o kung kinsa gyuy ilang iatbang.
Mura og gilipat-lipat ra ang ilang kaatbang, apan kun buot hunahunaon , kada kandidato ug kada partido aduna man gyuy kaugalingong masa nga tigsuporta.
Kani sila dili na mausab pa ang hunahuna kun kinsa ilang botaran bisan unsaon pa og ilad. Apan sa mga nagduha-duha pa o wala pa gyuy napilian, posibleng anhi makaginansya ang mga kandidato.
Samtang medyo libog paminawon ang sistema, apan mao naman gyuy naandan sa mga Pilipino. Dili makareklamo ang mga tawo kay una sa tanan, sila maoy nagbutang aning mga magbabalaod pinaagi sa eleksyon, ang mga magbabalaod maoy tighimo aning mga balaud ug polisiya nga sagupon as gobiyerno, mao nga kung dili madala og pakpak, kusmod nalang.