Unsaon pagbahin ang kabilin

Dear Atty. Divine,

Ang akong amahan naay kabilin sa iyang ginikanan nga mga yuta, ug sakyanan. Ang mga pangalan sa titulo sa iyaha pang mga ginikanan. Karon, namatay na ang akong Papa. Unsa may paagi pagbahin sa mga kabilin sa akong amahan nga buhi paman ang akong inahan? Kining tanan pulos kabilin sa akong apohan nga mga ginikanan sa akong amahan. Daghang Salamat. -- David

Dear David,

Kun adunay mga igsuon ang imong amahan dapat bahinon ang property in equal share sa tanan niyang mga igsuon apil na ang imong papa. Sa ato pa, kun tulo sila ka magsuon, bahinon og katulo ang tanang kabilin sa mga ginikanan sa imong amahan. Apan tungod kay patay na man ang imong amahan, kamong mga anak ug imong mama maoy morepresentar ug mo-inherit sa iyang share. Kun pananglit patay na sab ang mga igsuon sa imong papa then ang ilang mga heirs mao sab ang morepresentar sa ilang share ug maoy mopirma sa Extra-Judicial Partition. Apan bisan pa kun exclusive property kini sa imong papa apan tungod kay ang imong mama compulsory heir man sab sa imong papa uban kaninyong mga anak then kamo ang magbahin sa na-inherit nga kabilin sa imong papa gikan sa iyang mga ginikanan. Mas maayo nga inyong ipa-subdivide ang property aron ma identify ang inyong tagsa-tagsa ka share sa inyong Extra-Judicial Partition nga paga pirmahan. Dapat notarized ang maong dokumento then inyong i-submit sa BIR diin mahimutang ang iyang real property alang sa pagbayad og Estate Tax aron inyong ma-process ang pag-transfer niini ngadto sa inyong pagsa-tagsa ka pangan. Thank you and God Bless. -- Atty. Divine

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.