Ang gidaghanon sa mga anghel nga gihimo sa Dios

(Katapusang bahin)

Ang mga anghel mahimo bang mahigugma kanatong mga tawo? Sa lawasnong paagi ang tubag dili! Kini tungod kay ang mga anghel lunlon nga mga espiritu ug dili mahitabo  nga madani sila sa bisan unsang lawasnon. Hinunoa sila madani sa bisan unsang espirituhanon nga ania kanato nga mao ang atong mga kalag. Mao nga ang mga sugilanon nga naghisgot sa mga engkanto, dwende, diwata nga nahigugma kanatong mga mortal usa man ka dakong bakak].

Kun ugaling sila kunohay mahigugma kanato ug makiglambigit kanato, bugtong tinguha lamang nila ang pagpasipala ug pagdagmal kanato ang ilang tumong lunlon dautan ug walay maayo. Dili dayon ipakita sa mga espiritung elemental ang ilang mapintas nga laraw. Ila unang danihon ang usa ka tawo ngadto sa ilang mga gingharian. Ug kun huyang ra ang kabubut-on sa tawo mahimong malamat siya sa maong pagdapit ug kun atoa na sila didto sa dapit sa mga engkanto, diwata ug uban pa, ang naulahi mopadayag na sa ilang kangil-ad sa dagway ug binuhatan. Sa laing bahin ang mga anghel nga magbalantay ang gitahasan sa Dios sa pagpanalipod sa atong lawas ug kalag. Ilang gihigugma ang Dios ug ilang higugmaon ang gihigugma sa Dios.

Ang mga anghel nga naa sa hataas nga ranggo mamahimo ba nga mga anghel nga magbalantay?

Matud pa ang matag anghel mohimo sa iyang misyon segun sa iyang ranggo nga tungod niini, dili mahimo nga ang yanong mga tawo makabaton og mga anghel nga anaa sa hataas nga ranggo ingon nga mga anghel nga magbalantay. Sa laing bahin si San Bonaventura nagtuo nga gumikan sa mahinungdanong tahas kun misyon nga gibatonan sa usa ka tawo, sa matang sa bokasyon nga iyang gipuy-an ug sa opisyo nga iyang gituman. Nga sa ato pa mahimong adunay ipuno nga laing anghel nga magbalantay aron motabang kaniya sa maong gimbuhaton. Si Beata Catherine Emmerich nagkanayon: “Nakita niya sa panan-awon nga dunay daghang mga anghel nga nitabang sa mga pari ug mga Obispo gumikan sa ilang tahas nga mao ang pagluwas sa mga sala.

Ang atong Ginoo ang giatiman og daghang mga anghel human ang yawa nibiya kaniya ug sa higayon nga siya nag-ampo didto sa tanaman sa Getsemane ug kay si Jesus Dios ug tawo man nga matuod dili ikatingala nga ang mga anghel sa hataas nga ranggo ang ipadala aron moalagad kaniya. “Sa dihang gipadala sa Dios ang iyang panganay nga Anak nganhi sa Kalibotan miingon siya, kinahanglang simbahon siya sa tanang mga anghel sa Dios.”

Ang tulo ka mga arkanghel

San Gabriel

Sa Hebreo nagpasabot kini og: “Mensahero sa Dios” Iyang gipadangat ang mga mahinungdanon kaayong mga mensahe sa Dios. Sama pananglit sa iyang pagpadayag ngadto kang Zacarias ang taliabot nga pagkahimugso ni San Juan Magbubunyag.[9] Iya usab gimantala ngadto kang Santa Maria Birhen nga mamahimo siyang inahan ni Kristo Jesus[10] “Ang anghel miingon: AKO SI GABRIEL NGA NAGTINDOG ATUBANGAN SA DIOS NGA MAOY NAGSUGO KANAKO ARON PAGSULTI UG PAGSUGILON KANIMO NIINING MAAYONG BALITA”

San Raphael

Sa Hebreo kining maong ngalan nagpasabot og: “Tambal sa Dios” Siya ang manalipod sa mga masakiton ug kanila nga nagpanaw. Sa Basahon ni Tobit siya kadtong kauban ni Tobias anak ni Tobit. Iyang giayo si Tobit gikan sa pagakabuta[12] ingon man iyang gipalingkawas si Sara asawa ni Tobias gikan sa Demonyo gikan sa demonyo nga nipatay sa mga bana niini sa unang gabii sa ilang kaminyoon.

San Miguel

Ang iyang ngalan sa Hebreo nagpasabot nga: “Kinsay Sama sa Dios?” Walay si bisan kinsa o bisan unsa nga mga linalang nga makalabaw sa Dios. Sa Balaang Kasulatan siya kadtong nibuntog ug nipukan nga Lucifer, ang anghel nga masupilon ug ang mga hinanib niini nga nagdumili pag-alagad sa Dios. Nitabang siya aron sa langit sila mahinginlan. Siya ang manggugubat nga manalipod sa mga anak sa Dios batok sa pagbanhig ug paghasmag sa yawa. Siya ang tigpanalipod sa Simbahan ug dako ug matuod ang iyang pagsalig sa Dios nga angay uyamot sa iyang ngalan nga Miguel. “Si Miguel ang pangulong anghel wala man gani maghimo sa ingon sa iyang pakig-away sa Yawa. Sa Dihang naglalis sila sa lawas ni Moises, si Moises wala magpasipalag hukom sa yawa apan igo lamang siyang miingon: SILOTAN KA UNTA SA GINOO