Katawhan walay dag-anan

Maayo mangitag paagi ang administrasyong Marcos unsaon pagkolektag daghang kuwarta labi sa panahon nga maghinangat na ang eleksiyon.

Dili kini kontento sa trinilyong salapi nga utangon gikan sa gawas sa atong nasud, diin ang presidente adunay binilyong pahat alang sa iyang tinuig nga Office of the President’s Office confidential fund, gihilabtan-baligya pa ang 24.95 ka toneladang gold reserves gikan sa atong Bangko Sentral ng Pilipinas.

Ug niining bag-o, may balaod bahin sa 12% value added tax (VAT) para sa mga langyawng Digital Services sama sa Netflix, HBO, etc. sanglit ang mikonsumo sa ilang produkto ania man sa Pilipinas. May punto baya.

Pero dugang bug-at krus kini nga pas-anonon sa mga konsumidor.

Kay igo ra gyong ipatong sa mga tag-iya ang 12% VAT ngadto sa presyo sa ilang produkto. Busa, mga konsumidor gihapoy indirektang makabayad sa maong buhis.

Inay unahog sulbad ang dakong suliran sa kagutom, illegal drugs, kriminalidad, edukasiyon ug daghan pa, atong Kongreso nagpunay hinuog gukod ni Vice President Sara ‘Inday’ Z. Duterte nga dili man kini makapabarato sa bugas, uy!

Gumikan sa Office of the Vice President budget hearings, kanunayng molutaw ang pagkamatinud-anon sa tinubagan ni Inday.

Kadto lang higayon siya miingon-bulgar, nga ang nagkontrolar sa budget sa atong gobiyerno duroha ra ka tawo: House Speaker Martin Romualdez ug House Committee on Appropriations Chairperson Elizaldy Co?

Kini gimatuod mismo ni Department of Education Secretary Juan Edgardo ‘Sonny’ Angara, kinsa samtang nagdiskurso atubangan sa mga maestra atol sa pagsaulog sa Teachers Day, mihangyo ni Martin nga padugangan ang 2025 DepEd budget. Diin dihadiha, gisenyasan ni Martin nga; ‘approved!’

Usa lamang kini sa mga senariyong wala ikahimuot sa nailad 31M kapin nga botanteng maoy mipadaog ni Bongbong. Hagbay rang gusto nila siyang ilisan.

Apan anugon lang ilang mga Maisug Rally, diin ilang gipalanog ang tanang kahiwiang nahimo sa administrasiyong Marcos tungod kay ang Kongreso-Senado-DILG-Department of Justice-DILG, tanan iyaha na ni Marcos Jr. Ug kinsa pa bay moimbestigar niini? 

Leksiyon kini diha sa atong pagpili og kandidato. Kay kon kita masipyat-mailad, oras nga makalngkod nang gipili sa kinatas-ang puwesto, mahimo na kining gamhanan kaayo.

Ug bisag unsa pay buhaton sa katawhan, wala na gyoy dag-anan!