Namakak bisan sa edad

Pagkabasa nako og mga balita sa pipila sa gipanulti ni kanhi Presidente Rodrigo Duterte sa niaging semana, nangita ko sa YouTube sa kinatibuk-an sa press conference aron pagpaminaw sa uban pa niyang gipanulti ug pagsusi unsa nay iyang dagway ug sinultihan.

Mas luya nang iyang bayhon ug mas saguyod ning sinultihan. Pero kon duna tay angayng makat-onan sa mga paukyab sa kanhi presidente, dili angayng saligan bisan unsay makit-an ug madunggan niya. Tuod man, sama sa naandan, walay klaro ang tanan niyang mga tubag sa kasagaran sipsip nga mga pangutana.

Wala koy ideya kinsa ang nakatambong sa presscon. Pero nagduda ko nga kasagaran taga Davao kay dunay pipila nga nag-Binisaya ug wala sab kong kabantay nga nangimbitar ang mga Duterte sa reporters nga taga Manila.

Pipila sa mga pangutana klarong ulug-ulog sa kanhi presidente (unsay iyang ikasulti sa gideklarar nang daan sa nangutana nga pag-abuso sa mga kongresista nga sakop sa House Quad Committee sa gahom sa pagpangimbestigar ug pagsagpa og contempt sa ilang resource persons). Ang uban nilang pangutana gipatabanan nang daan og lawog nga mga tubag.

Sama sa ilang pangutana mag-senador ba si Duterte. Niingon si Duterte nga dili nang kalahutay og nasudnong kampanya ug mahimong mamatay sa Senado kay kinahanglan siyang motrabaho ug mo-biyahe.

Nangutana unsay ilang gusto nga iyang daganan. Nitubag ang reporters nga mahimong mobalik pagka mayor. Nangutana si Duterte mao ba sab ang sentimeno sa publiko. Dihang niyango ang reporters, nideklarar si Duterte nga mag-mayor na lang. Gibalita sa media nga morang gikan ni Duterte ang plano.

Dunay babayeng reporter nga nangayo sa iyang reaksiyon sa pasangil nga duna silay relasyon ni Koronel Royina Garma. Niingon si Duterte nga tapsing ang pangutana. Gihagit niyang mga kongresista sa pagklaro sa pasangil: Nga giuyab ug gi-xxxx niya si Garma? Walay nisumpay sa binastos.

Wala sab magtagad ang reporters sa pagkurihir sa mga bakak sa kanhi presidente. Bisan dihang giibanan ni Duterte ang iyang edad. Dihang niangkon nga 73 anyos na siya, walay nangahas pagpahinumdom ni Duterte nga natawo siya sa Maasin, Southern Leyte niadtong Marso 28, 1945. Sa ato pa, kapin sa 79 ka tuig nang nilabay. [30] [email protected]