Daghan ang nagbagutbot sa dress code nga gipatuman sa Basilica Minore del Santo Niño sugod niadtong Oktubre 1.
Ang mga Agustinong pari nga maoy tagdumala sa Basilica hugtanong midili sa mga mag shorts, mag-sleeveless, mag-spaghetti, magtsinelas, gisi-gisi nga karsones ug mugbo nga sinina alang sa kababayen-an nga makasulod sa pilgrim center ug sa simbahan.
Buot sa kaparian nga Agustino nga irespito ang kasagrado sa simbahan pinaagi sa pagsul-ob og disente nga sapot.
Husto ang gihimo sa kadagkuan sa Basilica. Ug wala ko makasabot nganong daghan ang nagbagulbol niini.
Matud sa uban nga mireklamo sa polisiya nga dili kuno importante ang sapot nga gisul-ob kun dili ang sulod sa kasingkasing sa tawo.
Tinuod bitaw, apan wa man mag-ingon ang mga pari sa Basilica nga kinahanglang bag-o o mahalon gyud ang imong isul-ob og mosimba ka sa Santo Niño.
Bisan pa og ukay-ukay imong sinina basta desente ug dili makita ang inyong pabawnan wa man tingali nay problema.
Ang nakadaot man gud sa uban nga mosimba kay hapit nalang molugwa ang ilang kalag.
Simple ra ang rason nganong buot sa kaparian sa Basilica nga desente ang isul-ob kun mosimba--respito sa kabalaan sa simbahan.
Dili ni kwestiyon kun maka afford o dili ang manimba sa dress code sa Basilica tungod kay di kinahanglang mahalon o branded ang imong isul-ob.
Ang importante nga desente ug dili law-ay nga tan-awon. Kun maningkamot ta nga presentableng tan-awon kun makigdate sa uyab, way rason nga dili ta magsinina og tarong atubangan sa Ginoo.