Sa lawasnong paagi ang tubag dili! Kini tungod kay ang mga anghel lunlon nga mga espiritu ug dili mahitabo nga madani sila sa bisan unsang lawasnon. Hinunoa sila madani sa bisan unsang espirituhanon nga ania kanato nga mao ang atong mga kalag.
Mao nga ang mga sugilanon nga naghisgot sa mga engkanto, dwende, diwata nga nahigugma kanatong mga mortal usa man ka dakong bakak.
Kun ugaling sila kunohay mahigugma kanato ug makiglambigit kanato, bugtong tinguha lamang nila ang pagpasipala ug pagdagmal kanato ang ilang tumong lunlon dautan ug walay maayo.
Dili dayon ipakita sa mga espiritung elemental ang ilang mapintas nga laraw. Ila unang danihon ang usa ka tawo ngadto sa ilang mga gingharian.
Ug kun huyang ra ang kabubut-on sa tawo mahimong malamat siya sa maong pagdapit ug kun atoa na sila didto sa dapit sa mga engkanto, diwata ug uban pa, ang naulahi mopadayag na sa ilang kangil-ad sa dagway ug binuhatan.
Sa laing bahin ang mga anghel nga magbalantay ang gitahasan sa Dios sa pagpanalipod sa atong lawas ug kalag. Ilang gihigugma ang Dios ug ilang higugmaon ang gihigugma sa Dios.
Ang mga engkanto, dwende, agta, diwata ug uban pa nailawom sa kategoriya sa mga espiritu sa kinaiyahan. Sila kadtong mga demonyo sa pinakaubos nga hut-ong diha sa hirarkiya sa mga demonyo.