Patriarchal ang katilingban sa kapanahonan sa atong Ginoo mao nga ang mga kababayen-an walay tingog. Sa walay igong rason daghanan sa mga kababayen-an ang mahimong I diborsiyo sa igong kasayon.
Mora bag walay igong pagtagad ang kalalakin-an sa bation sa babaye nga human magamit o mapahimuslan ang mahimo lamang ibalibag pinaagi sa pagsulat sa sulat pahibalo sa panagbulag.
Ang mga kabataan, sa laing bahin, nga nahimong biktima usab ning maong panlantaw. Kasab-an ug dili hatagan og igong pagtagad.
Mas tabangon pa ang mga tigulang kaysa mga bata kun dunay dakong gutom.
Kini tungod kay ang mga kabataan kuyog sa kababayen-an ang nahisakop sa marginalized sector sa ilang katilingban.
Ang atong Ginoo nanalipod kanila ug gani gihimo sila nga mga sanglitanan sa kamatuoran nga ang gingharian alang lamang sa mga sama kanila.
Timailhan lamang kini nga dunay luna ang mga kabus ug linupigan diha sa kasingkasing sa atong Ginoo.
Angayan natong hinuklogan nga ang mga kabataan sanglitanan sa gingharian, angayan lamang nga ato silang sundon.
Ang mga kababayen-an ug ang kaminyoon sagrado busa katungdanan nato ang pagdapig niini gikan ni bisan kinsa nga buot mogun-ob niini.