Dihang nisuporta si dismissed Cebu City Mayor Mike Rama ni Presidente Ferdinand Marcos Jr. sa eleksiyon sa 2022, gisukmatan sa iyang katiguwangan sa pagbudhi sa kasaysayan. Kay iyang uyoan, ang bantogang peryodista nga si Napoleon Rama, gipriso ni Ferdinand Marcos Sr. sa Fort Santiago uban ni Ninoy Aquino sa pagdeklarar sa martial law sa 1972.
Ambot unsay ilang sulti ning gidangatan ni Rama karon. Dili nang kabalik sa City Hall hangtod sa eleksiyon sa Mayo sa sunod tuig. Mahimo pa g’yong dili nang kahupot og bisan unsang puwesto sa gobiyerno.
* * *
Dihang gisuspenso si Rama sa Ombudsman sa Mayo, gidudahan nga gisilotan sa Malakanyang sa pagtambong sa rally ni kanhi Presidente Rodrigo Duterte sa SRP niadtong Pebrero. Dihang gitaktak siya sa Ombudsman sa niaging buwan, may pakapin pang pagdili sa pagpapili sa umaabot nga mga eleksiyon, naklaro nga giisip na siyang traydor sa administrasyon.
Atong klaruhon: Balido ang mga rason sa mga silot–paglabay sa upat ka trabahante nga way rason ug pagtudlo sa duha niya ka bayaw. Pero dili malihok ang mga kaso kon sikit pa siya sa presidente.
* * *
Kahibulongan nga kalit lang nga nawagtang ang tanan niyang bilib ug ulug-ulog ni Marcos Jr. dihang nasuspenso. Human giisnab ang pila ka adlaw niyang pagsuway pakigsulti sa presidente, nideklarar og suporta sa mga Duterte. Nga posibleng maoy nakapasamot sa iyang kaapiki.
Walay nakahunghong niya sa gihimo sa gisuspensong mga opisyal sa Bohol. Giputos nila ang kadalanan nga nalabyan sa pagduaw sa presidente niadtong Hulyo sa higanteng mga nawong ni Marcos Jr. Nalibkas ang ilang suspenso pagka Agosto.
* * *
Nganong gipili mang Rama ang kanhi presidente nga nitawag niyang drug protector niadtong 2016? Mapasalamaton ba nga, lahi sa ubang naapil sa drug list ni Duterte, wala siya patya? O tungod sa tabang ni Duterte niya sa 2019? Kanus-a niulbo ang pinatyanay ug panghasi sa bukirang mga barangay nga gipasangil ngadto sa kapolisan nga gipangulohan nilang Koronel Royina Garma ug Heneral Debold Sinas?
Demalas ang mga Sugboanon. Nisamot kaapiki sa pag-aleluya ni Rama kang Marcos Jr. sa 2022. Kay nabangkarota nang daan ang panudlanan sa City Hall sa taphaw nga mga politiko nga maoy gipaboran sa terorismo sa 2019.
* * *