Matud pa nga adunay siyam ka mga koro ang mga angheles. Gibahig kini sa tulo.
a. Pinakataas nga ranggo: Kadtong lunlon nga nialagad sa Dios gilangkoban kini ning mosunod:
1. Serapin
2. Kerubin
3. Trono
b. Kadtong nagdumala sa kalibutan ug ubang mga angheles naglangkob kini ning mosunod:
1. Kamandoan/Dominon
2. Birtud
3. Kagahuman
c. Kadtong mga mensahero ug tigpanalipod sa katawhan nga gilangkoban ning mosunod:
1. Prinsipalipad sila ang nagdumala sa kanasuran
2. Ang mga Arkanghel nga nagdala sa mensahe sa Dios ug dunay linain ug pinili nga misyon
3. Anghel nga magbalantay sila ang nagbantay sa katawhan ug kinaiyahan
Ang gidaghanon sa mga anghel nga gihimo sa Dios
Gimugna sa Dios ang kalibutan sa mga anghel sa usa lamang ka higayon. Nagpasabot kini nga ang ilang gidaghanon nagpabilin nga mao ra sukad pa sa sinugdan. Dili mahimo nga sila modaghan o magpadaghan gumikan sa ilang kinaiya nga mga espirituhanon. Kun sa ilang gidaghanon wala kita masayud. Ug wala nay gilalang nga mga anghel human nisukol si Lucifer.
Pila man gyud ka mga Anghel ang Nisukol sa Dios?
Ang basahon sa Gipadayag nagkanayon: “Gikahig niya pinaagi sa iyang ikog ang ikatulong bahin sa mga bitoon sa langit ug gitambog ngadto sa yuta.
Si Lucifer nga nahimong Satanas kuyog sa iyang mga anghel ang gibuntog ni San Miguel ug gitambog dinhi sa yuta.
“Unya may gubat didto sa langit. Si Miguel ug ang iyang mga kaubang mga anghel, nakigsangka sa dragon ug sa mga anghel niini. Apan nabuntog ang dragon ug ang mga anghel niini ug gipanghinginlan sila gikan sa langit. Gitambog ang dakong dragon, ang karaang bitin nga ginganlag yawa o Satanas nga maoy naglimbong sa tibuok kalibutan. Gitambog siya uban sa tanang mga anghel niya ngadto sa yuta.”
Ang mga masupilong anghel sa hataas nga orden mas gamhanan pa ba sa mga anghel nga anaa sa pinakaubos nga orden Han-ay?
Diha sa orden sa grasya nga sa ato pa ang kahimtang sa mga anghel human sa pagsulay nga niresulta sa pagkapukan sa mapagarbuhong anghel nga si Lucifer, ang mga anghel nga nagmatinud-anon ang nahatagan sa grasya ug kabalaan. Gipatas-an sa Dios ang ilang gahum ug himaya agig ganti sa ilang pagkamatinud-anon.
Sa ato pa, mas gamhanan ang mga anghel nga anaa sa pinakaubos nga ranggo sa orden sa mga anghel kun itandi sa mga pinakataas nga rangoo sa mga anghel diha sa orden sa pagpamuhat o sa panahon nga sila gibuhat sa wala pa sila mosupil batok sa Dios. Dugang pa ang mga balaang mga anghel nagdala kun nagbitbit sa gahom sa Gamhanang Dios bisan asa sila moadto ug ilawom sa ilang gahom ang mga demonyo. Ang atong mga anghel nga magbalantay mas gamhanan pa kang Satanas uban sa iyang mga hinanib.