Nagpusok-pusok ang paglugwa aning mga desisyon sa Ombudsman ug kanang sa korte batok sa nagkalain-laing mga naglingkod o incumbent officials aron sila suspensuhon o i-dismiss sa serbisyo.
Dili lang kini dinhi sa Sugbu nahitabo, nahitabo sab kini sa ubang mga lugar sa nasud. Tayming pud kaayo ang paglugwa aning maong mga dokumento nga naghinangat na ang sunod nga piniliay.
Pwedeng mapasanginlan nga dunay bulok pamolitika ang panahon sa pagpagawas niini.
Samtang tuod desisyon kini sa mga naa sa otoridad human sa ilang makuting imbestigasyon ug nakita nila nga sad-an ang gireklamong opisyal, namantsahan kini og malisya kay lagi padung naman ang eleksyon.
Kaning ubang mga desisyon dili tanan karon lang gyud nigawas o gipagawas, dunay uban nga pila na ka buwan kini nigawas apan gitago lang ug gitunong pagpublikar kun nagpadulong na ang sunod eleksyon.
Sanglitanan niini kadtong kaso ni Gob. Gwendolyn Garcia batok sa usa ka bangko, kaso kadto sa panahon nga dili pa siya gobernador sa Sugbu. Dili siya kawani sa gobiyerno adtong panahona kondili usa ka pribadong negosyante.
Giingong nigawas kadtong desisyon niadto ra diay nakalabay nga bulan sa Disyembre apan ning bag-ohay lang napublikar usa ka buwan sa dili pa ang pagduso og sertipika de kanditatora. Dili ba makaduda ang intensiyon?
Dili hinuon kini pwedeng ipasangil ngadto sa Ombudsman o sa mga korte kay wala man ni sila mopili og oras nga ipagawas ang ilang desisyon subay sa mando sa balaod nga kinahanglang dili malangan ang paghatag og hustisya para sa tanan.
Kuwang lang gyud tingali og follow-up ang mga hingtungdan o ba kaha wala sila magtuong magamit ug makaapektar kini batok kanila sa umaabot nga piniliay.
Mas maayo tingali para sa mga gustong modagan sa mga piniliay nga dunay mga pending nga mga kaso , siguraduhon nila nga makapangandam na sila daan og tubag.
Ug silay makauna pagpublikar sa desisyon ug sa ilang tubag sa mga kasong gisang-at batok kanila kaniadto aron dili makauna ang ilang mga kaatbang.
Ang politika sa Pilipinas ingon niini gyud, para sa uban gitawag kining ‘hugaw’ nga taktika, apan para sa uban sab, ‘para masayod ang tanan” depende nalang gyud sa pagsabot sa mga tawo.