Seguridad

Gitulis ug gipatay sa duha ka tulisan ang usa ka tinun-an sa usa ka universidad dinhi sa Sugbo niadtong miaging semana sa Barangay Basak San Nicolas ning dakbayan sa Sugbo.

Ang 18-anyos nga tinun-an sa kurso nga nautical taga lungsod sa Dalaguete sa lalawigan sa Sugbo. Nakuha sa tulisan gikan sa biktima ang iyang cellular phone ug salapi nga nagkantidad og kapin sa tulo ka libo.

Niadtong Septyembre 20 unom ka mga tawo nga nagtaptap sa ilang mga dagway ang misulod sa usa ka panimalay sa Barangay Bulacao ning dakbayan sa Sugbo ug nanguha sa mga butang sa balay lakip na ang kinse mil ka pesos ug usa ka libo nga sinsilyo.

Gawas sa pagpanguha sa mga butang ug salapi gidunggab pa sa mga responsable ang duha ka anak nga lalaki sa tag-iya sa balay. Ang krimen nahitabo sa alas 4:00 sa kaadlawon.

Sa buwan sa Agosto gipatay ug gisuwayan pa sa pagsunog ang patay nga lawas sa 27 anyos nga salesladay nga si Charina Baoy Relativo.

Gidudahan nga gipanamastamasan pa ang pagkababaye niini tungod kay hubo ang tibuok lawas niini sa dihang napalgan.

Si Relativo nga taga lungsod sa Argao sa lalawigan sa Sugbo gipatay sulod mismo sa iyang gipuy-an sa Barangay Bulacao ning  dakbayan sa Sugbo.

Gawas niini, daghan pang nagkalainlaing krimen ang nahitabo dinhi sa dakbayan sa Sugbo. Nadakpan man tuod ang mipatay sa tinun-an ug saleslady, dili pa gihapon ta makakompiyansa.

Lahi na karon ang mga tulisan. Kun kaniadto butang ra gayod ang pugos nga kuhaon sa mga tulisan, karon apilon na og kuha ang imong kinabuhi.

Dili na pud luwas nga puy-an ang imong panimalay tungod kay patyon kana sulod mismo sa imong panimalay.

Hinuon dili pa ta makaingon nga dili na luwas nga puy-an ang dakbayan sa Sugbo. Ayaw lang pod og kompiyansa.