Kinaiya sa mga deadliners

Sa nabatasan na, maghuot na usab ang mga buhatan sa Commission on Elections kon Comelec sa mga tawong gusto magparehistro sanglit karon man ang deadline ug wala nay lugway pa.

Pastilan dili gyud mawagtang kining kinaiyaha nga moapas sa kataposang adlaw sa mga kalihokan sama nalang niining pagparehistro aron makabotar sa umaabot nga eleksyon sa tuig 2025.

Sa kataas sa panahon nga gihatag sa Comelec pagparehistro apan gilabaylabayan ra sa mga tawo ug giunya-unya hangtud naabtan sa deadline.

Gawas sa kagustohan nga makabotar, apil usab ang kahinugon nga dili makadawat sa grasya gikan sa mga politiko nga mamalit og boto, mao kiniy tinuod nga rason dili man tanan apan realidad kini sa atong katilingban.

Ang mahasol ani sila ra man sad kay taas kaayo ang linya bahala na basta makaparehistro lang bahala na og mainitan ug magutman.

Kaluoy tawon ning mga tawhana makaingon man pud ta og mirese.

In fairness sa Comelec, gihimo na nila ang tanan pamaagi nga makapaduol sa katawhan aron makaparehistro.

Apan ang kada kalihokan nila gilangaw kay gamay ra ang mo-participate kay nagsalig na naa pa bitaw laing adlaw hangtud naabtan sa deaine. Kining kinaiyaha iya sa mga tapolan ug walay klaro sa ilang tumong sa kinabuhi nga angayan usbon.

Bitaw tan-awon nato kon maatiman ba sa Comelec ang tanan kay dili na ra ba malugwayan og oras, kadtong dili makaabot sa oras pasensya nalang huwata nalang ang sunod nga ting rehistro.

Samtang walay pahuwayay ang Comelec sanglit ugmang adlawa Oktobre 1 magsugod ang filing sa Certificate of Candidacy hangtud na sa Oktobre 8.

Hinuon mora’g dili pa seguro kaayo modagsa ang mga filers ilabi na kadtong mahilig sa petsa nga swerte kuno nga ang petsa 8. Kong maohon magdasok na sad sa kataposang adlaw sa filing sa COC.

Atangan nato ang buena manong COC filer sa pagsugod sa COC filing ug dinhi na nato makita ang kolor sa mga politiko ug sa ilang grupo.

Duna bay mga bag-ong nawong o mga karaan gihapon ang magtigi sa umaabot bugnong lugaynon.