Kon tuohan ang kasayoran nga nahipos sa House Quad-Committee niadtong Biyernes, labihan ka-mangtas ni Koronel Royina Garma, kanhi general manager sa Philippine Charity Sweepstakes Office (PCSO). Sa pagpatuman sa iyang plano sa pagpatay sa giisip nga kinadak-an nga babag sa iyang mga palusot sa ahensiya nga si PCSO Board Secretary Wesley Barayuga niadtong 2020:
Gitental niya og brand new nga service vehicle si Barayuga kay mas lisod patyon sa sakyanang pamasahero; ug
Giletratohan niya si Barayuga samtang nag-board meeting ug gi-Viber ngadto sa hired killers pagsegurong makaila sila sa target.
* * *
Aron mahilom ang kaso, kay nitanyag og usa ka milyon ka pesos ang classmates ni Barayuga sa Philippine Military Academy (PMA) sa makatug-an kinsa ang responsable, iyang mga kauban sa Philippine National Police Academy (PNPA) ang nangulo sa imbestigasyon.
Nagsugod ang mga imbestigador sa naandang mga anggulo nga posibleng gipatay sa Barayuga tungod sa trabaho ug personal nga atraso. Gitapos ang imbestigasyon sa pasangil nga apil si Barayuga sa ilegal nga drugas. Bahala na kon nabantog ang kayano ug kaligdong ni Barayuga nga tig-bawon gani og paniudto sa PCSO.
* * *
Dili amaw ang classmates ni Barayuga. Dugay rang nahibawo kinsay nagpapatay niya. Nahipos sa ilang kaugalingong imbestigasyon ang tanang detalye sa krimen, apil nang koneksiyon ni Garma. Pero wala sila magsaba, Wala gani sultihi sa ilang nahibaw-an ang nagbangotan nga pamilya.
Kay nahadlok sila. Kahibawo unsa kasuod si Garma ni kanhi Presidente Rodrigo Duterte. Bisan ang pangulo sa ilang klase, si kanhi Secretary Eduardo Año sa Department of Interior and Local Government (DILG), nipalabi sa pagpabilin sa puwesto.
* * *
Sa tibuok adlaw nga imbestigasyon wala molubay ang kabagtok sa dagway ni Garma. Bisan sa mga pasangil sa kadaghan sa iyang krimen, kuwarta, kabalayan ug gitangkil nga kaparyentihan. Apil nang iyang anak nga giminatayan kay labihan kamasakiton pero himsog diay ug gitudlong confidential agent sa PCSO.
Pero bisan si Alice Guo nakalimot sa naandang kakalma tungod sa documentary sa Al Jazeera nga niila niyang espiya sa China. Tingali matsambahan ra sang buslot sa taming ni Garma. Kay padayong tanggungon samtang magpadayon ang imbestigasyon, kon wala manungog ang presiding officer nga si Kongresista Ace Barbers, hangtod sa sunod tuig.
* * *