Sama ra'g laborer

Mipasidaan ang embahada sa Pilipinas sa Wellington, New Zealand sa mga Pilipino nurses nga magmainampingon sa paglangyaw sa maong lugar tungod sa kakulang didto sa oportunidad alang sa maong propesyon.  

Isip mga frontliner sa pag-atiman sa atong panglawas, angayan unta nga hatagan ang mga nurse sa hustong pagtagad sa kagamhanan. 

Matud pa bitaw sa usa ka nurse, “Mas pilion na lang namo nga motrabaho sa abroad bisan sa kamingaw kay ang among sweldo didto mora’g sa doktor, samtang dinhi sa ato, ang sweldo namo mora’g sa laborer.”  Fezteleern!

Automatic nga mohinay

Nagtuo si Cebu City Councilor Rey Gealon nga ang hingpit nga pagpatuman sa Road Speed Limiter Law makatabang sa pagpakunhod sa mga aksidente sa kadalanan sa dakbayan. 

Dili na tingale kinahanglan ang maong balaod. Tungod sa ka-grabe sa trapik sa atong kadalanan, automatic na nga mohinay ang dagan sa mga sakyanan.

Sugyot sa akong amigo, “Maayo pa tingale maghimo’g balaod nga magasilot niadtong mga gitahasan’g opisyal sa kagamhanan apan wala makasulbad sa nagkagrabe nga trapik sa kadalanan.”  Muleeng! 

Nakagusto ang GRO                                                       

Alang sa militanteng pundok nga Bagong Alyansang Makabayan (Bayan), aduna pa’y igong panahon alang sa pagpalagpot (impeach) ni Bise Presidente Sara Duterte sa iyang katungdanan bisan pa man nga nagsingabot na ang 2025 midterm election. Layo pa ang 2028 eleksyon alang sa pagpili sa sunod nga presidente apan nagsugod na ang demolition job sa gituohan nga lig-on nga contender sa maong posisyon.   Angay nga magmabinantayon ang mga botante kay ginaingon man nga “Ang paglaban nimo sa usa ka politiko sama ra nga mitoo ka nga ang dancer o GRO sa club nakagusto gayod kanimo.”  Madahaan!

Nagpatuo nga patay

Nasikop sa NBI ang usa ka babaye tungod sa sala’ng pagpalsipikar sa mga publikong dokumento ingon man sa kalapasan sa Anti-Alias Law. 

Nahitabo ang pagdakop human masayran nga ang gidakop nga si Mary Ann Maslog migamit og peke nga ngalan nga “Jessica Francisco” ug nga nag-atubang kini og kaso nga bribery ug uban pa’ng mga financial crimes.  Makapahinumdum sa estorya sa usa ka utangan nga sulagma nga maoy napangutana sa naningil kon nakaila ba siya sa tawo nga nangutang. 

Sa tuyo ba kaha nga dili na siya makabayad, yano ra’ng mitubag nga “Patay na man na siya.”  Pagkatoytoy!

Wala na’y pagsalig

Gituki pag-usab sa Cebu City Council ang nagpadayon nga konstruksyon sa Cebu City Medical Center (CCMC) ug ni’ng higayona, gi-awhag nila si Acting Mayor Raymond Alvin Garcia nga ihikling una ang pag-gamit sa  P700 milyones nga pundo alang sa pagtibawas sa hospital building. 

Buot sa konseho nga sulbaron una ang mga isyu nga naglimin sa pagtrabaho sa CCMC, lakip na ang kabahin sa mga donasyon gikan sa mga pribadong institusyon.  Kon unsa man ang hinungdan sa pagtuki sa konseho, hinaut nga magbunga kini’g kaayohan. 

Kay ginaingon man nga “Kon mawala na ang pagsalig, molipang usab ang pagduda.”  Mao maan!