Ayaw palipat

Nasuta nga ang mga tangkal sa baboy nga anaa daplin sa kasapaan usa sa nakaingon nga misamot kahugaw ang atong kadagatan.

Husto gyud. Gawas nga hugaw kaayo ang atong kasapaan kay daghang mga nagpuyo daplin sa kasapaan nga moderitso ra paglabay sa mga basura sa sapa, naa pa ang mga tae sa baboy.

Matud sa pangulo sa Cebu City Environment and Natural Resources Office (CCENRO) nga susihon nila ang mga tangkal sa baboy, ilabi na ang duol og sapa, kon may septic tanks ba.

Dili ra kay kana lang maoy inyong susihon sir. Susiha usab ninyo kon ang mga septic tanks, kon duna man gani, kon wa may pultahan nga ablihan nila kon magbaha na.

Akong nahibaw-an nga sagad sa mga tangkal sa baboy nga daplin sa sapa, gihimoan tuod og septic tanks aron adto didto i-deposit ang hugaw sa baboy, apan kon mag-uwan ug magbaha na, ablihan nila ang tabon sa gawasanan sa hugaw.

Resulta? Buhagay ngadto sa sapa ang mga hugaw sa baboy ug mora lang og way nahitabo. Kinsa man tuod ang mo-inspection sa mga tangkal sa baboy kon mag-uwan?

Bisan pa gani ang mga empliyado sa barangay way gana nga mo-inspection sa mga tangkal sa baboy sa tagsatagsa nila ka mga dapit kon mobunok na ang ulan.

Ang ilang himoon, motikotkot ra sila sulod sa ilang opisina o kaha panimalay aron dili mabasa ug dili matugnawan. Dili ba tinuod?

Mao nga sa pag-inspection sa CCENRO, unta “diniyos” gyud nga pag-inspection, sutaon nila kon ang septic tanks sa mga tangkal wa bay lungag nga pwede ra paagason ngadto sa sapa ang hugaw kon magbaha na.

* * *

Si Police Colonel Antonietto Cañete mao gyud ang gipili ni Cebu City Acting Mayor Raymond Alvin Garcia nga hepe sa kapolisan dinhi sa siyudad.

Awhagon nako si Colonel Cañete nga mandoan niya ang mga polis sa lainlaing station nga magpahigayon og checkpoint kay mora’g mihasi na karon ang pagpanulis.

Pastilan, kadtong nanulis og estudyante didto sa Barangay Tisa ug armado’g 45 kalibre nga pistola, unya nadakpan ra usab dayon, susama ra ba’g apilyido sa bag-ong hepe.

Dukla to’ng ulo niadto Sir, kay nagpakauwaw lang to nimo. Klarohon nako nga dili to sila paryente ug ang bag-ong hepe sa kapolisan sa siyudad kay taga Bantayan man ni si Sir Cañete.

Bisan pa og dagko na’g silot karon ang masakpan nga magdala’g armas nga way pagtugot sa balaod, duna gihapo’y mga tawo nga dili mahadlok kay nakita man nila nga way mga polis nga mag-checkpoint.

Awhag sab nako sa mga magmotor, kay mao man gyud ni ang sagad sakyan sa mga tulisan, ayaw mo kahadlok pagbukas sa inyong mga U-Box kon wa mo’y gitagoan nga kontrabando.

gains tax?