(Katapusan)
Ang pamaagi sa panlimbong nga gihimo sa mga mini nga pari ug eksorsista, samot na og pakapinan pa sa garbo ingon man kamapahitas-on ang ikalipay pag-ayo sa yawa.
Ang yawa sayud ug makaila kun kinsa ang adunay katungod ug gahom sa paghingilin kaniya.
Makuyaw kini alang sa nagpaaron nga pari ug eksorsista ingon man sa pasyente kun biktima nga gialagaran. Mamahimo silang abli sa panimalos gikan sa demonyo.
PAHIMANGNO
Susiha ug pangutana sa padre kura ug sa chancery office kun ugaling dunay mga tawong kadudahan nga mangangkon nga sila mga pari ug eksorsista. Daghan ang mga sulpot karong mga panahona.
7. Ang Panimalos Gikan sa Yawa
Human mahinginli ang yawa gikan sa tawo, dapit, ug butang anaa ang dakong purohan nga siya o sila manimalos.
Mahimong ila kining ipunting ngadto sa biktima, sa mga tawo nga suod niini, sa palibot ug sa kabtangan. Ang mga dautang mga espiritu nga nasamok ug napahawa pinaagi sa gahom sa Dios ang manimalos gyud gumikan sa ilang pangangkon nga sila dunay legal nga katungod ngadto sa tawo, dapit o butang. Nahitabo kini gumikan ning mosunod:
a. Okulto nga binuhatan ug konsagrasyon
b. Kasabutan uban ni Satanas
c. Patuo-tuo
d. Ug mga naandang sala nga wala gyud makumpisal ug wala mahinulsoli.
Manimalos sila aron kapugngan ang hingpit nga pagtahan ug pagsalig sa kaugalingon ngadto sa Dios sa tawo nga sulod sa hataas nga panahon anaa ilawom sa ilang pagmando ug gahom. Aron makalikay ang si bisan kinsa gikan sa maong panimalos kinahanglang buhaton kining mosunod:
a. Pag-ampo sa kanunay
b. Pagpuyo sa kahimtang sa grasya
c. Hugot nga pagtuo ngadto sa Dios