Dili gyud mawala sa mga pahina sa mga mantalaan ug mga balita sa radio ug telebisyon kining problema sa katilingban sa ilegal nga drugas.
Gani kada adlaw naa gyud niini, ang nakaayo lang kay ang mga balita mahitungod man sa mga durugistang nangadakpan sa mga operasyon sa otoridad.
Apan kun itandi ang gidaghanon sa mga nangasakmit sa mga operasyon karon sa kaniadto, mas nigrabe man hinuon kadaghan.
Kaniadto gramo-gramo ra gyud ang makuha , gani gitawag na gani sa mga polis nga “bigtime druglords” kadtong madakpan ug makuhaan og tagsa ka bulto nga pila ra ka gramo.
Apan karon, kinilo na ug duna pay mga panagsang drug raid nga tonelada gyud nga shabu ang nasakmit sama didto sa Luzon.
Karon ang mga nadakpan mga “newly identified” nga mga drug suspeks, ang nakalahi lang sa una, karon naa nay termino nga “bodegero.” Sa ato pa mao kini ang naghupot sa mga supply.
Ang mga dinakpan nanug-an sab sa mga otoridad nga duna silay kontak sa suds a mga prisohan nga maoy matud pa naghimo og transaksyon ug igo ra silang gisuholan isip tighatud.
Makahibulong nganong dili man mapitol kining mga piniriso nga padayun diay gihapon sa ilang negosyo sa ilegal nga drugas?
Giunsa man nila pakig-transaksyon? Makagawas-gawas diay ni sila aron makigkita sa ilang mga kasabot nga mopalit og drugas?
Murag lisod ni buhaton tungod sa kahigpit sa seguridad sa mga pasildad sa prisohan, apan labing siguro nigamit ni sila og selpon ug ubang matang sa komunikasyon.
Mga butang nga gikonsiderar nga luho para sa mga PDLs sa mga bilanggoan ug gidili kini basi sa polisiya.
Kaniadto nisibaw ang mga estoryang mopalit og signal jammers nga i-instalar diha sa mga prisohan, natinuod ba ni? Mura man og wala.
Kun kining mga druglords nga naa sa mga prisohan putlan og pamaagi sa komunikasyon, wala magpasabot nga mahunong na gyud kining negosyo sa ilegal nga drugas.
Makapangita man tuod sila og paagi, apan dako kini og matabang para mabalda ang ilang operasyon.
Apan kinahanglang seryuso ang mga ahensiya sa gobiyerno pagpatuman aning mga pamaagiha dili lang kutob sugyot, hisgotan apan wala buhata.