Labihang sayona para ni Zhao Shouqui, tag-iya sa gironda nga Tourist Garden Hotel sa Agus, Lapu-Lapu City, pagtanyag sa mga operatiba sa Presidential Anti-Organized Crime Commission (PAOCC) og usa ka milyon ka pesos aron hatagan og espesyal nga pagtagad ang iyang 70 anyos nga asawa ug apo nga babaye nga naapil sa mga dinakpan.
Wala niya isipa nga suburno ang kuwarta. Puwerteng dagkoa tingali sa iyang naandang mga transaksiyon nga morag sensiyo ra ang gitanyag ngadto sa PAOCC dili lang kausa, dili lang kaduha, kon dili katulo gyod ka higayon.
* * *
Maong masaligon siyang nipasalig ni Senador Risa Hontiveros, ang tagdumala sa nagpadayong imbestigasyon sa ilegal nga POGO, nga dili sab suburno ang iyang gihatag nga computers, mga pagkaon og kuwarta para sa gastohan sa nangaging kalihokan sa Lapu-Lapu ug Sugbo.
Nahibawo tang tanan kinsay nakadawat sa kasagaran sa mga hinabang. Mapagarbuhong gisangyaw ni Lapu-Lapu City Mayor Ahong Chan sa iyang Facebook page ang mga donasyon nga iyang nadawat. Malipayon siyang nagpa-letrato uban ni Zhao Shouqui. Nga atol sa ronda nakuhaan og ID sa Lapu-Lapu City Hall isip iyang consultant.
* * *
Tsamba ba lang nga ang grupo ni Zhao Shouqui nga Lapu-Lapu City Philippines Tourism Ethnic Chinese Guild natukod niadtong 2019 dungan sa pagpabarug ang POGO hubs sa Bamban, Tarlac ug sa Porac, Pampanga?
Tsamba ba lang nga ang presidente sa Chinese Guild nga si Zhao Long, anak ni Zhao Shouqui ug maoy naghatag sa usa ka milyon ka pesos nga iyang gitanyag sa PAOCC, mao ang giila nga pangulo sa usa sa scamming hubs sa POGO sa Porac?
* **
Tsamba ba lang nga ang KTV bar sulod sa hotel sa Agus nasakpan sa National Bureau of Investigation (NBI) nga namugaw og mga babaye gikan sa Mainland China ngadto sa lokal nga mga kustomer niadtong 2019 pero padayong gihatagan og business permit ni Chan?
Gikatahong gi-delete na ni Chan ang tanan niyang social media posts parte sa Chinese Guild. Ambot kanus-a i-uli ang tanan niyang nadawat gikan nilang Zhao Shouqui ug kaubanan. Nga mahimong ginansiya sa pag-torture sa Pilipino ug langyaw nga mga trabahante sa tibuok adlaw ug tibuok gabii nilang pangilad ug ubang krimen.
* **