Gubot pa’s lukot

Ang Osmeña Boulevard gikan sa eskina Sanciangko Street paingon na ngadto sa Plaza Independencia dunay sidewalks sa matag kilid sa karsada nga anaa mahimutang ilawom sa mga building.

Anha diha mag-again ang mga pedestrians kay dili man sila mainitan, ug dili mabasa bisan pa og mag-uwan. Apan ambot unsay nasu’d sa utok sa kadagkoan sa Department of Transportation (DOTr) nga maghimo man gyud sila og laing sidewalk nga anha ibanon sa karsada?

Nahibu’ng sab ko kay ang mga opisyal sa atong kagamhanan wa man sab gyud misupak niining tinguha sa kadagkoan sa DOTr?

Bisan pa og ibutang nato nga way gasto ang kagamhanan sa Cebu City niining mao nga proyekto, apan para nako angay unta kini nga supakon kay moresulta ra ni og grabeng traffic.

Tiaw mo nga ang four-lanes nga karsada, (duha ka lane sa usa ka direction) himoon na lang usa ka lane? Mahimo na lang nga usa ka lane kay ang daplin butangan pa man sa DOTr og sidewalk.

Nganong butangan pa man og sidewalk nga naa na may arcaded sidewalks kilid sa mga building? Kinsa man ang ganahan moagi sa sidewalk nga daplin sa karsada kon init kaayo, ug labaw na kon mag-uwan?

Karon, ini’g sugod sa proyekto nga magbutang ang DOTr og Loading ug Unloading Bay sa pipila ka bahin sa Osmeña Boulevard gikan sa Sanciangko paingon sa Plaza Independencia, mapugos ang Cebu City Transportation Office (CCTO) nga dili na pasudlon ang mga pribadong sakyanan.

Lagmit nga ang tugotan nga makasulod sa Osmeña Boulevard gikan sa Plaza paingon sa eskina Sanciangko, ang mga public utility vehicles na lang, sama sa PUJ, MPUJ ug taxi.

Ang mga private vehicles magpunsisok na lang didto sa mga gagmay’ng karsada ug sigurado nga daghan gyud ang magbagulbol niini.

Para nako, wa gyuy problema ang BRT project kon lapad pa ang atong karsada, apan gipamugos gyud kini nila nga makapasamot man kini sa problema sa traffic.

Wa pa gani makahuman ang DOTr sa paghimo sa eclusive lanes sa BRT diha sa Osmeña Boulevard gikan sa eskina P. Del Rosario paingon sa Kapitolyo, klaron naghimo na usab sila og laing proyekto nga makapadugang sa problema sa traffic.

Mosamot ang problema kay dunay mga grahe sa mga department stores sama sa Gaisano Metro nga dili na mahimong kasudlan og sakyanan kay sirad-an na man ang eskina Sanciangko paingon sa Plaza Independencia para sa mga pribado nga sakyanan.

Sigurado ko nga ang resulta niini, gubot pa’s lukot!