Kinsay sad-an sa kamatayon sa maestra?

Subo palandungon nga niining pagsaulog sa Teachers' Month o buwan alang sa mga magtutudlo, mitumaw ang dakong isyu nga naglambigit sa usa ka maestra, tinun-an, ginikanan ug principal nga nisangpot sa kamatayon gyud sa magtutudlo didto sa Davao de Oro.

Nagsugod ang tanan dihang natapigas ang bata ug napakong ang ulo sa bangko ug nagkadugo. Usa sa nakatampo niini ang giingong bullying sa isi'g ka bata o classmate niini ug giingong gipapauli sa ilang balay nga gikakurat sa ginikanan kinsa niadto sa eskwelahan ug nideretso man dayon sa principal kinsa sa walay pagpanuko gidabodabohan og kasaba ang maestra.

Kini ang hinungdan sa grabeng stress nga gjbati ni ma'am ug nisangpot na hinuon sa iyang kamatayon nga nakaani og simpatiya karon tungod sa iyang gidangatan.

Kinsa man ang sad-an sa nahitabo? Siyempre ang principal nga nideretso og lansang sa krus sa maestra nga wala gani maminaw sa pagpasabot niini kong unsa ang tinuod nga nahitabo. Unta gihusay niya daan ang isyu, gipaminaw ang side sa teacher isip pagtamod sa due process nga wala gyud nahimo sa walay buot nga principal.

Tinuod adunay child protection policy ang mga eskwelahan apan alang sa school administrator panalipdan usab nila ang katungod sa ilang mga magtutudlo kay kinsa man ang dangpan nila kong gihukman na silangndaan sa ilang school head.

Ang ginikanan sa bata, naputos sa bashing kay siya usab ang nahimong hinungdan sa kamatayon sa teacher. Apan isip ginikanan bation gyud ang kabalaka ilabi na nga makita ang anak nga nagkadugo kay instinct man na ilabi na sa usa ka inahan busa makasabot ra unta  kita sa inahan.

Sa namatay nga maestra, daan na kini nga adunay gipamati sa lawas ug biklonon na kaayo ang panglawas nga wala kaagwanta sa gipakitang dautan nga batasan sa ilang principal. Ang trabaho sa magtutudlo stressful kaayo ilabi nga badalongon ang mga tinun-an apil na ang mga konsentidor nga ginikanan. Dili man sa pagbasol kay patay na siya pero, alang sa mga magtutudlo unahon gyud ninyo ang inyong kaugalingon dili magpadala sa stress. Magpahiling sa mga experto sa panglawas aron dili mapilde nga kinabuhi gyud ang makutlo.

Duna pa gyud diay mora'g diktador nga estilo sa pagdumala sa mga tunghaan nga magpahangad og maayo ang principal kinsa ubos ang pagtan-aw sa uban. Hinumdumi nga position ang kalainan apan managsama ra gihapon kamong mga tawo busa magrespetohay gyud aron walay masikatan ug walay mabasol sa kauwahian.