Gisulti sa kanhi Mayor sa dakbayan sa Sugbo Tomas Osmeña sa mga sakop sa Quad Committee nga nagpahigayon og congressional inquiry mahitungod sa extrajudicial killings (EJK) ug Philippine Offshore Gaming Operators (POGO) nga tigdawatan og usa ka milyon matag semana gikan sa illegal nga kalihokan si Police Superintendent Royina Garma sa dihang siya pa ang pangulo sa Criminal Investigation and Detection Group didto sa siyudad sa Davao. Kini basi sa taho nga iyang nadawat.
Gisulti usab sa kanhi mayor sa dakbayan sa Sugbo nga dili siya makatubag sa pangutana mahitungod sa operasyon sa POGO sa dakbayan sa Lapu-Lapu pero iyang gidudahan si Michael “Mike” Dino, kanhi Presidential Assistant for the Visayas, nga nalambigit sa POGO operation tungod sa gipanag-iya niini nga mga tag-as nga building dinhi sa Sugbo nga posibleng gigamit sa operation sa POGO.
Asa man dapita dinhi sa dakbayan sa Sugbo nga may gipanag-iya nga tagas nga building si Mike Dino? May gipresentar ba nga ebidensiya kabahin niini si Osmeña didto sa Quad Committee? Modawat diay ang komitiba sa Ubos Balay Balauranan og ingon ani nga testimonya nga gikan sa mga Marites?
Kun ugaling modawat og testimonya ang komitiba gikan sa mga Marites, dili malayo nga ang komitiba nahimo na usab nga Marites.
Una na natong gipangutana nganong si Osmeña ang giimbitar sa Quad Committee nga pangotanon mahitungod sa EJK ug POGO dinhi sa Sugbo?
Kun wala pa mo makalimot, nagbuntaog sa mga balita dihang ang kanhi mayor pa ang nagdala sa renda sa kagamhanan sa dakbayan sa Sugbo nga mihatag siya og tag P50k niadtong mga polis nga makapatay og mga criminal.
Dinhi puwede siyang pangutan-on kay konektado kini sa EJK pero kun maghisgot na og POGO dili na siya makatubag niini. Gani ang kanhi mayor mipahibawo na daan sa komitiba. Ang problema lang kay bisan dili siya ang saktong tawo nga patubagon bahin sa POGO, namasangil siya ni Dino nga konektado sa POGO.