(Ikatulong bahin)
Gitawag kini og demonic subjugation. Ang mga tambalan o albularyo nga nakadawat og gahom gikan sa ilang mga espiritu nga abyan ang adunay gahom sa pagmando ug pag-ulipon sa mga demonyo sa mas ubos nga ranggo.
Atong hinumdoman ang mga demonyo adunay herarkiya sama sa mga anghel sa langit.
Mogawas nga naayo na ang pasyente apan ang wala lang masayri nga nagpakahilom ang mga dautang espiritu nga anaa sa tawo apan moabot ang panahon nga ang mas hataas ug gamhanang demonyo ang moangkon sa maong tawo ug mas mosamot kangil-ad ang iyang kahimtang kay sa kanhiay.
Mograbe ang iyang balatian gumikan ra usab sa mga albularyo o tambalan nga nigamit og mga pamaagi nga iya sa okulto ug dili gikan kang Kristo. Mamahimo ang pasyente nga huyang ug abli sa bisan unsang balatian, tunglo, o mahimong abli nga mayawaan.
5. Ang kalainan sa Pag-ampo alang sa Kalingkawasan ug Eksorsismo ug ang Pag-ampo Alang sa Kaayohan
a. Ang Pag-ampo sa Eksorsismo mao man ang pagpalingkawas sa usa ka tawo, butang o dapit gikan sa gahum ug impluwensiya, ug gahom sa mga dautang espiritu.
Adunay linain nga kahulogan ang pulong eksorsismo. Nagpasabot kini nga sa paagi nga katilingbanon ang Simbahan mosangpit sa ngalan ni Jesu Kristo aron hinginlan ang dautang espiritu ug palingkawason ang si bisan kinsa nga naulipon sa gahom niini. Ug diha sa Simbahan ang maong balansayon pagahimoon lamang sa pari nga gihatagan og gahom sa paghimo niini kun ang authorized exorcist pinaagi sa pormal nga ritwal nga gitawag og eksorsismo.
Ang mga simple nga matang sa eksorsismo mahimong pagadumalahon ni bisan kinsang pari samtang ang solemne nga eksorsismo ang pagahimoon gyud sa usa ka natahasang eksorsista. (Padayonon)