Akong klarohon nga sayop kadtong mga balita nga pangdakpon na kuno ang mga sakyanan nga masakpang migamit og mga improvised plate numbers.
Resulta kadto kay dunay mga reporters nga nagsuwat sa maong balita nga wa kaayo masuhito sa mga isyu nga naglambigit ang Land Transportation Office (LTO).
Gituyo nako ni pagsuwat dinhi sa atong lindog aron nga mahuwasan intawon sa kahadlok ang mga tag-iya og sakyanan nga hangtud ron wa pay original nga plaka gikan sa LTO.
Ayaw mo kahadlok kay dili inyong sala kon hangtud karon way mga original plate numbers ang inyong mga sakyanan.
Si LTO-Region 7 Director Glen Galario mipasabot nga kadtong mga sakyanan nga narehistro gikan sa Enero 1, 2023 hangtud karon, kinahanglang duna na gyu’y “assigned plate numbers.”
Ini'g parehistro sa mga tag-iya og sakyanan, o kaha mga dealers, ang LTO mohatag na og original plate numbers, ug kon wa pa sila’y plaka, ibutang na diha sa Certificate of Registration ang assigned plate sa maong sakyanan.
Kon ang LTO wa pa makahatag og original plate numbers, mohatag ra sila og Authority to Use Improvised Plate, ug ang tag-iya sa sakyanan magpahimo ra og improvised plate nga ibase sa Conduction Sticker, o kaha sa assigned plate numbers.
Pero kadtong mga sakyanan nga narehistro hangtud sa Disyembre 31, 2022, makahimo gihapon sa paggamit og improvised plate numbers nga ibase sa Motor Vehicle File, sama nianang makita nimo nga 0701-7658921 ug uban pa.
Kinahanglang ang tag-iya sa mga sakyanan nga migamit og improvised plates, duna gyuy Authority to Use Improvised Plate nga giisyu sa LTO nga maoy nagrehistro sa sakyanan.
Apan kini maoy timan-i ninyo. Kon ang LTO nakaisyu na og original plate numbers sa maong mga sakyanan nga padayong migamit og improvised plates, diha na nga higayona nga makamulta ang driver nga magmaneho sa sakyanan.
Sa ato pa, kamong mga tag-iya og sakyanan, susiha gyud ninyo didto sa gipalitan ninyo sa inyong salyanan kay basin og anaa na ang plaka niini, pero wa lang ninyo makuha.
Duna ra bay mga car ug motorcycle dealers nga maayo lang mamaligya apan dili maayo moserbisyo sa ilang mga kliyente.
* * *
Pahimuslan na lang sab nako pag-awhag ang PNP Highway Patrol Group ug ang LTO nga unta mohimo sila og kampanya nga pangdakpon ang mga driver sa mga sakyanan nga dili mopasiga sa ilang suga, o headlight panahon sa gabii.
Kuyaw kaayo nga makadisgrasya kining maong mga driver, sagad mga PUJ drivers, nga ambot nganong dili gyud nila pasigaon ang suga sa ilang sakyanan.
Ang uban miingon nga dili kuno nila pasigaon ang suga kay kalas sa gasolina. Pastilan tawon, pagka ignoy!