Editoryal — Martial Law

Kagahapong adlawa ang ika-52 nga kasumaran sa pagpirma sa Martial Law ubos sa rehimen ni kanhi presidente Ferdinand Marcos Sr., ang amahan sa kasamtangan karong lider sa nasud nga si Presidente Ferdinand “Bongbong” Marcos Jr.

Septiyembre 21,1972 sa dihang gipirmahan Marcos ang Presidential Proclamation No. 1081 nga nagbutang sa tibuok nasud sa Martial Law, apan Septiyembre 23, 1972 sa alas-7 sa gabii niya kini gianunsyo diha sa Malacañang.

Ang rason niya mao ang hulga sa Partido Komunista ug ang nag-umidong rebelyon didto sa Mindanao. Apan ang mga kritiko mipasangil nga gigamit ni Marcos ang maong proklamasyon aron magpabilin sa iyang gahum aron malugwayan pa ang duha niini ka termino.

Gihulagway kadtong panahona nga “mangitngit” nga bahin sa kasaysayan sa Pilipinas. Daghang gipatay, gidagit nga wala na igkita, miabusar ang kasundalohan ug ang konstabularya ug nagpadato ang mga naa sa sud sa sirkulo sa presidente.

Usa sa mga sektor nga gipiit nianang panahona mao ang kagawasan sa pagpadayag sa katawhan, apil na niini ang iyang mga kritiko ug labaw sa tanan ang independenteng media.

Hinuon napalagpot siya pinaagi sa EDSA Revolution  niadtong Pebrero 1986 ug milayas padung sa Hawaii sa Amerika. Nabawi sa mga Pilipino ang kagawasan ug demokrasya sa nasud.

Apan namatikdan sab nga human sa maong rebolusyon miabusar na sab ang mga naa sa gahum pinaagi sa paggamit sa ilang posisyon ug impluwensiya aron makapangawkaw og kwarta sa publiko ug makatukod og mga negosyo gamit ang ilang posisyon.

Atol sa pagtimaan sa Martial Law kagahapon,  nasamok ang lihok protesta nga gilusad sa nagkadaiyang mga militanteng pundok didto sa kaulohan. Sila mipasangil nga walay nahimong maayo para sa nasud si Marcos Jr. para sa ikaalibyo sa kahimtang sa mga Pilipino karon.

Karon ang anak nga kasamtangang naglingkod nga pangulo nga si PBBM, misaad nga ubos sa iyang administrasyon paningkamotan nga magpabilin ang kagawasan sa pagpadayag ug protektahan ang media. Maayo unta og mosanong ug tahuron sa iyang mga ginsakupang mga naa sa gahum ug posisyon ang kagawasan sa media. 

Kay bisan sa paninguha sa media nga balanse ang mga balita ug mga opinyon duna gyuy mga masilo nga nakahibalong tinuod ang gibalita batok kanila.