Nakabantay si kanhi Cebu City Councilor Margot Osmeña nga mga kan-anan, shopping malls ug ubang publikong mga lugar nga ilang giadtoan, ang iyang bana nga si kanhi Mayor Tomas Osmeña gipakpakan, gilamano, gipasalamatan, giletratohan ug giawhag sa pagbalik sa pagdumala sa City Hall. Iyang gisungog ang bana nga wala ni mahitabo kaniadto nga mayor pa siya. Kanus-a kasagaran sa nalabyan mapanagan-on nga nitagad, may nangahadlok nga ilang malingian ug mga isog ray nangahas pagtimbaya.
Sa iyang pangutana nga, “Unsa may nahitabo?” dunay andam nga tubag ang iyang bana, “Buyer’s remorse.”
* * *
Ang tinuod nga kadaot nga nahimo nilang Koronel Royina Garma ug Heneral Debold Sinas ug sa mga politikong nagsugo ug gipaboran nila, nga gibasol sa laktod nga pinatyanay ug bangis nga pagpanghasi batok sa inosenteng mga Sugbuanon, mao ang pagka-bangkarota karon sa syudad.
Gikan sa pagka labing maayong syudad sa Pilipinas ubos ni Osmeña dili nang katiwas sa pagtukod sa iyang ospital, dili na katarung pagkolekta sa basura, nisamot ka-inutil sa pagsulbad sa baha ug dili ganing kamao nga mosukod sa rubberized track oval sa niagi nga Palarong Pambansa.
* * *
Mao nga dihang nahimong Covid-19 capital ang Cebu City atol sa pandemiya, nga gisakyan sa mga politiko pagtukod og buwag nga P100 milyones nga Cebu City Quarantine Center (CCQC) imbes paghuman sa Cebu City Medical Center (CCMC), nangandoy ang mga Sugboanon sa takos nga liderato ni Osmeña.
Maong nga dihang nagkayamukat ang Sugbo human sa bagyong Odette kay wala igkita ang lokal nga mga opisyal, gimingaw ang mga Sugbuanon sa pagpangulo ni Osmeña sa pagbarug sa Sugbo human sa bagyong Ruping.
* * *
Angay’ng manubag silang Garma, Sinas, kanhi Presidente Rodrigo Duterte ug ilang mga alyado sa Sugbo sa mga kinabuhi nga nakalas ug mga panginabuhi nga nagusbat sa ilang pagkumkom sa balaod ug pagpangyatak sa mga tawhanong katungod.
Pero angay sang paninglan sa dakong katalagman sa paghikaw sa mga Sugbuanon sa tarung nga liderato. Silang Garma, Sinas, Duterte ug kaubanan nilawog sa syudad ngadto sa tirong sa taphawng pagduma. Nga nipalabi sa panguwarta ug paukyab ug personal nga mga interes. Kay sa pagsubay sa direksiyon sa kalamboan nga gilatid sa lider nga igo na lang gikamingawan.
* * *