Unsa kaha kaluwas ang mga imported nga isda gikan sa ubang nasud? Luwas kaha kini nga pagkaon para sa mga tawo?
Mao kini ang mga pangutana karon sa pipila ka netizens nga naukay aning isda nga napalit sa merkado nga matud pa dunay plastic o mura og giputos og plastic ang lawas niini.
Hinuon wala pay klarong eksplinasyon nga gihatag ang mga otoridad sa kamerkadohan o sa Bureau of Fisheries and Aquatic Resources kun unsa ni ka tinuod.
Pipila ka tuig na ang nakalabay duna say susamang hitabo nga nabalita sab sa radyo, isda nga “salmonete” o “salmon-salmon” usa kini ka isda nga susama og isdang andohaw apan lingin ang lawas.
Mura og giputos og plastic ang tibuok lawas. Kaning maong isdaa dili na makuha dinhi sa Pilipinas sanglit mura kini og naa lang mabuhi sa mga bugnaw nga lugar.
Wala ba kaha kini gituyo og putos og plastic aron mapreserbar og dugay sa mga freezers sa mga fishing boats? Wala may laing pwedeng eksplinasyon tingali kondili mao lang ni.
Kana kung dunay eksperto moingon nga ang maong gituohang plastik normal nga panit sa maong matang sa isda, kana , mokalma tingali ang hunahuna sa tawo.
Apan kun dili gani,daghan gyung mabalaka kun luwas bang kan-on kining maong mga isdaa gikan sa laing nasud.
Ang Pilipinas tigpalitan o tig-import man sab og isda gikan sa mga silingang nasud sama sa Indonesia ug sa China.
Apan sa duha, ang China lamang maoy daghang fishing fleets nga maabot sa mga lagyong kadagatan sama sa South America.
Samtang dili pa sigurado kun unsa kini ka tinuod, maayo tingaling dunay mga batid o mga eksperto sa klase-klaseng isda diha sa BFAR ang makahatag og katin-awan bahin niini.
Usa pa, ang BFAR adunay kasayuran bahin aning mga importasyon sa mga isda gikan sa ubang mga nasud.