Tomas Osmeña giimbitar ni Barbers

Giimbitar si kanhi Cebu City Mayor Tomas Osmeña sa Committee on Dangerous Drugs sa Ubos Balay Balauranan nga gipangulohan ni Kongresista Robert Ace Barbers aron pangutan-on mahitungod sa extra-judicial killings ug Philippine Offshore Gaming Operators (POGO).

Sa nakalabay nga imbestigasyon sa Komitiba ni Barbers diin resource person ang kanhi hepe sa kapolisan sa dakbayan sa Dugbo nga si Col. Royina Garma nahisgotan ang pangalan sa kanhi mayor hinungdan nga siya naimbitahan apan mahitungod lamang kini sa extra-judicial killings ug dilis a POGO.

Sa dihang si Osmeña pa ang naglingkod nga mayor sa dakbayan sa Sugbo, mihatag siya og reward nga tag P50,000 ngadto sa mga polis nga makapatay sa mga badlungon sa katilingban ilabi na sa mga nalambigit sa gidili nga drugas. Dinhing dapita puwede nga maimbistigaran si Tomas Osmeña pero kun imbistigahon siya mahitungod sa POGO maingon nato nga nasaag ang Kongresista.

Unsa may labot ni Lolo Tomas Osmeña sa operasyon sa POGO sa dakbayan sa Lapu-lapu nga wala man gani ni siya makapuyo didto. Ambot lang kaha og nakasuroy pa ba ni siya sa Lapu-Lapu, unya maoy pangolutan-on ni Kongresista Barbers mahitungod sa POGO? Maayo Seguro nga balihon ni Kongresista Barbers ang iyang sinina kay nasaag siya.

Si Mayor Jonard “Ahong” Chan sa dakbayan sa Lapu-lapu Kongresista Barbers ang imbitaha ayaw si Lolo Tomas. Si Mayor Chan ang angayan nimong pangutan-on congressman, kay sa iyang dakbayan naluwas ang 169 ka mga langyaw nga gipatrabaho sa POGO. Si Mayor Chan usab ang nagsulti nga walay POGO nga nag-operate sa iyang dakbayan. Mao nga kun aduna kay gustong masayran sa operasyon sa POGO sa dakbayan sa Lapu-Lapu si Mayor Chan lang ang makatubag ning tanan.

Sa paminaw nako mangluod si Mayor Chan nimo Kongresista Barbers kay nganong dili siya ang imong pangutan-on sa operasyon sa POGO sa dakbayan sa Lapu-lapu.

Mas maayo seguro Congressman Barbers nga sa sunod mangutana ka kinsa ang mayor sa usa ka dapit nga dunay gusto ninyong imbistigahan dili kay modritso ka lang og hamag.