Garcia-Daluz tandem?

Gilusad niadtong Martes sa gabii ang us aka socio-political group nga gitawag og Cebu Now Na!

Tumong sa grupo mao kuno ang paghatag og sulbad sa nag-unang problema sa dakbayan sama sa basura, baha ug uban pa. Ang soft launching sa grupo gihimo sa usa ka mall sa South Road Properties diin mihimo sab og konsyerto ang pipila ka mga inilang banda.

Atol sa kalihukan didto silang acting Cebu City Mayor Raymond Garcia ug ang tsirman sa MCWD ug pangulo sa Partido Panaghiusa nga si Joey Daluz III. Didto sab ang kapitan sa Basak-Pardo nga si Dave Tumulak.

Si Daluz ug Tumulak gihugon-hugon nga magpares sa umaabot eleksiyon isip mayor ug bise mayor.

Gani duna nay mga tarpaulin nilang Daluz ug Tumulak nga makita sa kadalanan sa dakbayan timaan nga sila dunay plano nga magpapili sa moabot nga eleksiyon.

Dugay na hinuon ko nga nakadungog gikan sa usa ka kasaligan nga tinubdan nga maghiusa silang Garcia ug Daluz batok ni suspended mayor Michael Rama sa sunod eleksiyon.

Apan wala ko hingpit motuo sa maong kasayuran hangtod sa ilang pahibawo niadtong Martes sa gabii nga kinahanglan nilang magtinabangay aron pagsulbad sa mga problema sa syudad.

Kun mahinayon ang Garcia-Daluz tandem, si Tumulak posibling maoy ilang kandidato sa kongreso diha sa South District. Kun imo hinuong susihon ang kaagi sa ilang grupo, tataw nga si Rama maoy maapektuhan niini tungod kay kauban sila sa miaging eleksiyon.

Bintaha ni alang sa Bando Osmeña Pundok Kauswagan (BOPK). Dili hinuon angayang makampanti ang BOPK tungod kay posibling makuhaan sab sila og supporters kun magpapili isip runningmate ni Rama si Konsehal Franklyn Ong.

Daghan pa hinuon ang posibling mahitabo hangtod sa filing sa certificate of candidacy. Apan usa ka butang ang angayang hinumduman sa mga lumolopyo sa dakbayan sa Sugbo, sa pagpili og lider dili importante ang apilyedo—plataporma ug track record ang mahinungdanon.