Alegre ron sa Kongreso

Nindot kaayo paminawon ang hearing sa Kongreso karong adlawa kon si kanhi Cebu City Mayor Tomas Osmeña motambong unya sukitsukiton siya sa kabahin sa pagkatudlo ni Koronel Royina Garma nga hepe sa kapolisan dinhi sa dakbayan kaniadto.

Ang Joint Committee Hearing pagadumalahon sa mga sakop sa Committees on Dangerous Drugs, Public Order and Safety, Human Rights and Public Accounts.

Ang mga isyu nga tukion sa mga kongresista mao ang kabahin sa extra-judicial killings, illegal gambling ug uban pa nga mga isyu nga naglambigit ang peace and order.

Nahukman sa mga kongresista nga si Osmeña ilang imbitahon isip resource person kay atol sa iyang administrasyon pagka mayor sa Cebu City, supak siya nga si Garma maoy makalingkod nga hepe sa kapolisan.

Naa man gud sa balaod nga gilatid sa Section 62, sa Local Government Code nga katungod sa mga mayor ang pagpili kon kinsa ang matudlo nga hepe sa kapolisan sa ilang lugar.

Apan nasayran sa mga kongresista nga bisan og gisupak ni Osmeña ang pagkatudlo ni Garma isip hepe sa kapolisan sa Cebu City, ang iyang pagsupak giyam-iran lang niadto ni kanhi PNP Chief Ronald “Bato” Dela Rosa.

Si Garma nakaatubang na sa Joint Committee hearing sa Kongreso ug nakabantay ang mga magbabalaod nga dunay mga higayon nga namakak si Garma sa iyang mga tubag, ug nga wa siya magtug-an sa matuod.

Kini maoy hinungdan nga gipa-contempt si Garma sa mga kongresista ug gipapriso sa Kongreso, hangtud nga mahuman ang hearing nga nagtuki sa isyu.

Dinhi sa Cebu City, tinuod nga daghang mga pagpamatay nga nahitabo atol sa termino ni Garma pagka hepe sa kapolisan, apan ang uban sa mga gipatay duna man sa’y mga bati nga rekord, sama sa mga druglord.

Para nako, oki ra sab to. Apan unsaon man, matud sa mga kongresista nga kinahanglang sundon ang balaod nga dili lapason ang tawhanong katungod sa mga tawo.

Bisan og ang tawo nakahimo og grabeng salaod, tumanon gyud ang balaod ug hatagan siya og “due process” nga tubagon ang kaso sa hukmanan, ug kon mamatud-ang sad-an ang silot ibase kon unsay gilatid sa balaod.

Tan-aw lagi nako niini, kuyaw nga dunay mga iladong tawo, nga maglakip sa pipila ka PNP Chief, posible pa gani tingali nga maapil si kanhi Presidente Duterte, nga mangapriso niini.

Nagtuo gyud ko nga moabot ang higayon nga si Presidente Bongbong Marcos motugot ra gyud nga ipatuman ang warrant of arrest nga iisyu unya sa International Criminal Court.

Ang usa sa nakapalig-on nga duna gyuy extra-judicial killings atol sa administrasyon ni Duterte mao ang pamahayag ni Police Lt. Col. Jovie Espenido nga miangkong siya ang gigamit kaniadto ni PNP Chief Dela Rosa nga "wad-on ang drugas," ug apil kuno niini ang pagwagtang sa mga druglords.