Namug-ok batok sa gipug-ok

Maihap na lang sa lima ka tudlo ang mga kongresistang nagmahal sa katarong-kaligdong-kapatas diha sa ilang paghimog desisyon panahon sa mga budget hearings nga himoon sulod sa Kongreso. Duha kanila, kinsa pagtuki sa ikaduhang 2025 Office of the Vice President (OVP) Budget hearing, mipakitag maisogong labok taliwala sa nagkayong pagsinukliay og iya-iyang baroganan, mao sila si: Rep. Rodante Marcoleta ug Rep. Isidro Tom Ungab.

Dihang namatikdan ni Rep. Marcoleta nga gikaligutgot g'yud sa House Committee on Appropriations nga gipangulohan ni Chairman Rep. Elizaldy Co ug Vice Chairperson Rep. Stella  Quimbo ang wala pagtungha ni Vice President Sara ‘Inday’ Z. Duterte, sila iyang gipahinumdoman nga sa miaging first budget hearing naplastar-nahatag-natubag na ni Inday ang tanang gikinahanglan alang sa maong budget proposal.

Ikaduha, nahimo nang tradisiyon ang pagrespeto sa ‘parliamentary courtesy’ – pag-aprobar gilayon sa annual budget proposal sa Presidente ug Bise Presidente para sa iyaiyang opisina.

Gumikan niining tin-aw'ng pamahayag ni Rep. Marcoleta, mipakanaug gilayon siya'g motion nga i-terminate na ang OVP budget hearing. Ug gisegundahan ni Rep. Ungab. Pero gisupak kini ni Rep. Raoul Manuel. Busa nakahukom si Quimbo nga magbinotohay na lang kinsay pabor, kinsay dili? Resulta? Tulo ray nakuha ni Marcoleta samtang kang Quimbo, 40 kapin.

Nalaslasan gyod ang 2025 OVP budget proposal ni Inday. Gikan sa P2.03B, nahimo na lang P733M. Butang nga gikasigmuyo sa netizens ug adunay mi-lifestyle-check dayon ni Quimbo.

Hinungdan, nasayran. Nga kaniadto isip maestra, magsakay ra'g tricycle si Quimbo nga magsul-ob-tener lamang og baratohong step-in, sinina ug bags. Pero karon nga nakadikit na ni House Speaker Martin Romualdez ug Rep. Zaldy Co, minilyon na ang balor sa iyang bags, sakyanan, lote’g balay, etc.

Mao ba kini ganti sa iyang tinguhang pagpug-ok sa OVP budget proposal ni Inday? Aw nasubay hinuon unsa ka korap si Quimbo ug gihinganllan pag ‘Kawatan!’ Samtang si Inday nga gisigehan nilag pug-ok, misamot kahumot sa katawhan, kinsa ultimong pobreng farmers mipalanog sa ilang kaandam pagtabang ni Inday. Lakip mga Senador nakasaway sab sa gihimo sa Kongreso.

Ang Senado maoy pinaling moaprobar sa naasoyng budget oras nga moabot kini sa ilaha. Kinsa kahay modaog: ang namug-ok, o gipug-ok? Ang Kongreso, o si Inday?