LTO pobreg serbisyo, mga kliyente napurihisyo

Naghinapos bulan sa Nobiyembre 2023, nagpa-renew na ko sa akong driver’s license sa Land Transportation Office (LTO)-Robinson, Fuente Osmeña, Cebu City. Human masumiter-mabayari tanang rekisitos, giisyuhan dayon kog driver’s license nga giimprintag papel.

Nangutana ko sa officer-in-charge nganong dili man plastic ilang gihatag nga nabayran naman namo tanan? Haskang dalia niya nakatubag: “Taudtaod nang naguba among plastic driver’s license printer, Bay. Unya gikuha-gidala kini didto sa Manila aron ayohon. Apan hangtod karon wala pa ibalik.”

Pastilan, misiyok akong dalunggan, uy! Siyaro, wala gyod sila mangitag alternatibo aron ilang serbisyo dili malangay? Ug kalikayan ang makalilisang backlog?

Tan-awa unsay nahitabo sa LTO-SM City Branch, oh? Ang labihang kataas sa mga nanaglinyang motoristang gustong mokuha sa ilang lehitimong plate numbers, diin miabot una og pipila ka tuig, ayha pa nahimo. Ug dihang andam na para i-release, libolibo ang napundo kay gilaay nag balikbalik kanhi ang mga nagsige palo-ap.

Ang pait, kay mihatag nag ultimatum ang LTO, diin kinsa kadtong temporary plate number gihapoy gigamit, dakpon na ug pamultahon. Pastilan, sa dakong pagpasagad sa LTO, ang mga biktimang kliyente pay ilang silotan?

Sa miaging Marso 27, 2024, gianunsiyo sa LTO nga ang mga driver’s license nga papel ilisan na nilag plastic sugod April 15, 2024. Apan hasta kapila na lang ko magbalikbalik sa LTO-Fuente, hangtod ning pagsulat, wala gihapon mailisdig plastik akong lisensiyang papel. Ngano? Kay wala na gyod kuno mahibalik ilang printer. Gani, adto lang kuno sila mosingit sa pagparintag plastic licenses sa LTO-SM City. Diin limitado ray maprinta. 

Sanglit mousa ka tuig na hapit akong pagpinaabot, unya senior citizen na pod, misulay kog hangyo sa in-charge kon mahimo bang mabuhatan na lang ko? Ay sus, igo ra kong gitubag og: “Ang mga nakaaplay hangtod niadtong Agosto 2023 mao pa nay among giasikaso. Imoha, Nobiyembre 2023 man, tan-aw-tan-awa lang sa among on line kanus-a imohang schedule!”

Ingon niini moserbisyo ang taga-LTO ubos sa pagpamunoan ni Presidente Bongbong Marcos. Lahi ra sa panahon ni kanhi Presidente Rodrigo R. Duterte, kinsa magsigeg pukpok sa tanang ahensiya sa gobiyerno nga kinahanglan paspas-limpyong serbisyo gyoy idalit sa katawhan kanunay.

Matang sa pagpangalagad nga dili mapapas-makalimtan sa kasaysayan.