Kahawod ni Garma
Mga nakakita ni Koronel Royina Garma sa labing unang higayon niadtong Huwebes wala makugang, kay kasarangan nang esena sa mga imbestigasyon sa Kongreso, sa iyang paghilak ug paghangyo sa mga kongresista nga dili siya tanggungon kay tandugon ang kahimtang sa iyang anak.
Pero napugwat ang mga nakaila ni Garma niadtong siya pay hepe sa Cebu City Police Office sa pagsulbong sa laktod nga pinatyanay sa drug war ni kanhi Presidente Duterte. Human nisalida sa naandang kahawod pagsugod sa public hearing, nakaamgo si Garma nga wala nay gahom ang iyang padrino.
* * *
Nakurat ang mga Sugboanon dili lang tungod sa pagkausab sa dagway ni Garma kon dili tungod kay walay bisan usa nga nagpaabot nga kapaninglan pa sa gipasangil nga bangis nga mga krimen. Mahimong mautingkay ang duguon nga agi ni Garma sa Sugbo kon moatubang si kanhi Cebu City Mayor Tommy Osmeña sa House quad-committee nga nagsusi sa koneksiyon sa POGO, illegal drugs ug extrajudicial killings.
Salamat nga unang nailhan sa mga kongresista si Garma kay gipasanginlang utok sa pagpatay sa tulo ka Chinese drug lords sa prisohan sa Davao.
* * *
Nanukad ang kahawod ni Garma sa Davao, Sugbo ug Philippine Charity Sweepstakes Office (PCSO) sa iyang kasuod ni Duterte. Human nihimakak sa espesyal nga koneksiyon, nasipyat si Garma pagkumpisal nga diretso siyang nakigkita ni Duterte sa Malakanyang bisan unsang orasa.
Maong bisan si Osmeña, nga giilang alas sa politika sa Cebu City sukad sa unang termino pagka mayor sa 1987, walay dag-anan sa giingong pagsugo ni Garma sa mga polis paghasi sa iyang mga lider ug mga botante niadtong 2019.
* * *
Labing nabantang ang abuso ni Garma dihang napusilan ang 4 anyos nga si Skyler Abatayo sa Bato, Ermita, Cebu City niadtong 2018. Gidasonan ni Garma ang bersiyon sa iyang mga sakop nga ilang gikapinusilay nga drug lord ang responsable.
Human nisumbong ang mga silingan nga walay pinusilay, napamatud-an sa National Bureau of Investigastion (NBI) nga polis sa Carbon ang nakaigo sa bata. Maong gikiha sa Ombudsman ang mga polis nga nakapatay ug nibabag sa imbestigasyon. Ginamit ang iyang kasuod ni Duterte, gipalabay ni Garma ang direktor sa NBI ngadto sa Mindanao ug gi-promote ang gikihang mga polis.
* * *
- Latest
