Paspas nakaresponde ang mga polis?

Naghimo og “drama” ang mga polis nga duna kuno’y tulis nga nahitabo sa usa ka pawnshop didto sa Leon Kilat Street kaniadtong Huwebes, ug matud pa nga dali ra kaayo nga nakaresponde ang mga polis.

Nakakatawa ko nga nagbasa sa report sa usa ka media outlet diha sa social media. Natural nga dali ra nga makaabot ang mga polis kay simulation exercise ra man nila.

Ang gipaabot sa katawhan mao ang tinuod gyud nga responding time sa kapolisan kon may mahitabo nga krimen sama sa pagpanulis, unya mapatay gyud nila ang mga tulisan.

Diha tingaling higayona dayegon nako pag-ayo ang mga polis. Pero abi ninyo, nakasabot ko sa sitwasyon sa mga polis nga lisud sab alang kanila nga makaresponde dayon sa tanang higayon.

Una, dugay kaayo nga makaalarma ang mga hingtungdan nga balay patigayon nga gitulis kay mora’g wa na mag-function ang ilang alarm system nga konektado sa mga police station.

Sama gud sa mga bangko nga kon tulison ni, dunay sekretong switch nga inigpislit niini, moalarma dayon didto sa police station ug mahibaw-an dayon sa mga polis.

Awhagon na lang nato ang mga polis nga paninguhaa lang gyud ninyo nga kon may tulis, tinuod gyud nga anaa gyud dayon mo, aron dili mo mahulog lang sa kataw-anan.

* * *

Gibutyag sa kapolisan nga ila na’ng nailhan ang lima ka mangunguot, nga mikawat sa cellphone sa usa ka babaye nga misimba sa Basilica del Santo Niño niadtong miaging adlaw.

Sigurado ko nga ang mga sakop sa Theft and Robbery Section sa atong kapolisan, nakaila gyud sa maong mga babaye kay duna man sila’y mga hulagway sa mga madakpang mangunguot.

Way batasan ang maong mga mangunguot nga bisan sulod sa simbahan namiktima sila. Kay binuang man ang ilang gihimo, angay sab tingali nga himoan sila’g binuang.

Kon madakpan ni sila, mas maayo tingali nga usbon ang ilang birthday ngadto na sa Nobiyembre 2. Dili angay’ng kaloy-on kining matanga sa mga tawo.

* * *

Kadtong gustong mobotar sa eleksyon karong sunod tuig, unya wa pa mo marehistro, parehistro na mo kay ang pagpangrehistro sa Comelec kutob na lang karong Septiyembre 30.

Adto mo sa opisina sa Comelec. Pero diri sa Cebu City, dunay nagpadayong pagpangrehistro diha sa SM City Mall kay gituyo ni aron dili maghuot diha sa ilang opisina. Pagdala lang mo og kamatuoran sa inyong pagkatawo, sama sa valid ID nga giisyu sa kagamhanan. Kini naglakip sa ID nga giisyu sa Philippine Statistics Office, Driver’s License, Passport, SSS, ug uban pa.