Dili maayo ang sinugdanan sa semana sa mga Duterte. Nadakpan man o nisurender, natanggong si Apollo Quiboloy nga walay bisan usa sa gipasigarbong walo ka milyon ka sakop nga nagprotesta, dili lang sa Edsa kon dili sa bisan asa nga dalan sa Davao.
Nigawas si Quiboloy sa compound sa Kingdom of Jesus Christ (KoJC) niadtong Domingo, Septiyembre 8, pila ka adlaw human gideklarar si Bise Presidente Sara Duterte Carpio nga nilayas na sa Davao. Ug duha ka adlaw human gipalayas sa alyadong mga senador ang kapolisan kay nag-usik sa panahon pagpangita niya.
* * *
Nisamit kaapiki dihang walay nikubit sa pag-intriga sa mga abogado ni Quiboloy sa militar ug kapolisan. Gisupak ni Defense Secretary Gibo Teodoro ang ilang petisyon pagbalhin ni Quiboloy sa kustodiya sa Armed Forces of the Philippines (AFP). Labaw nang wala tagda ang awhag sa house arrest.
Gituki na lang karon kon nganong gibutang si Quiboloy sa custodial center sa Kampo Crame, headquarters sa Philippine National Police (PNP), imbes sa prisohan sa Bureau of Jail Management and Penology (BJMP) sama sa ubang mga piniriso nga nagpaabot sa husay sa kaso.
* * *
Niirog ang semana nga nisumbalik sa bise presidente ang pag-isnab sa House Appropriations Committee niadtong Martes, Septiyembre 10, human nagdumili pagtubag sa mga pangutana niadtong Agosto 27. Walay natay-og sa gipagawas nga scripted ug edited nga interview, nga wala gani ipakita ang interviewer, nga nipasangil nga duha ra ka kongresista ang nagkontrolar sa nasudnong budget.
Gisukmatan hinuon nganong walay gihimo pagtarung sa budget sa siya pay education secretary ug BFF pa silang Presidente Ferdinand Marcos Jr.
* * *
Sa akong pagsuwat ini, wala mo-arang-arang ang kahimtang sa mga Duterte:
Gilaslasan og P1.2 bilyones ang iyang gipangayo nga P2 bilyones nga budget sa Office of the Vice President (OVP) sa 2025;
Gitanggong sa House si kanhi presidential spokesperson Harry Roque kay wala mosumiter sa gisaad nga mga dokumento pagpatin-aw sa pagburot sa iyang katigayonan pagsulbong sa Philippine Offshore and Gaming Operations (POGO); ug labaw sa tanan
Wala pa gihapoy polis, sundawo, o sibilyan nga nitubag sa medyo bahaw na nilang awhag sa People Power Tres aron mapalagpot si Marcos ug makabalik na sila sa Malakanyang.
* * *